У Рэчыцкім раёне ад удару токам загінулі двое мужчын
27 ліпеня, Позірк. Двое мужчын загінулі ад удару токам 27 ліпеня ў Рэчыцкім раёне (Гомельская вобласць), паведамляе Следчы камітэт.
Паводле папярэдніх звестак ведамства, трое мужчын “ажыццяўлялі перавешванне сейсмічнага кабеля праз аўтадарогу М-10”, падчас работ “яны закранулі металічным абсталяваннем лінію электраперадач”.
У выніку “двое мужчын (43 і 25 гадоў) загінулі на месцы, яшчэ адзін шпіталізаваны”.
“На месцы здарэння працуе следча-аператыўная група. Следчым з прыцягненнем спецыялістаў упраўлення Дзяржаўнага камітэта судовых экспертыз па Гомельскай вобласці і Дэпартамента дзяржаўнай інспекцыі працы праводзіцца агляд месца здарэння, фіксуецца следавая карціна. Апытваюцца відавочцы, плануецца прызначэнне шэрагу экспертных даследаванняў”, — гаворыцца ў паведамленні.
Абставіны здарэння будуць устаноўленыя падчас праверкі, “асаблівая ўвага будзе нададзеная прычынам і ўмовам, якія спрыялі трагедыі”, адзначае СК.
