Доля кантрабандных цыгарэт, што ўвозяцца праз мяжу з Беларуссю, знізілася да 41% — мытня Літвы

28 ліпеня, Позірк. У першым паўгоддзі 41% кантрабандных цыгарэт, якія ўвозіліся ў Літву, перахопленыя на мяжы з Беларуссю, паведамляе Мытная служба балтыйскай дзяржавы.

За аналагічны перыяд 2024-га гэты паказчык складаў 49%, звяртае ўвагу ведамства.

“Значная частка цыгарэт з Беларусі ўвозіцца ў легкавых аўтамабілях, якія правяраюцца выбарачна, пасля ацэнкі профілю рызыкі”, — гаворыцца ў паведамленні.

Разам з тым у літоўскай мытні “ёсць падазрэнні, што грузавікі перавозяць як “арыгінальныя” беларускія цыгарэты, так і кантрафактныя — вырабленыя на падпольных фабрыках у Латвіі”.

Адзначаецца, што пры існуючых мерах кантролю “кантрабандысты шукаюць новыя шляхі” дастаўкі ў Літву нелегальнай тытунёвай прадукцыі. Адзін з такіх шляхоў — мяжа з Латвіяй, “адкуль увозяцца як беларускія кантрабандныя цыгарэты, так і цыгарэты, вырабленыя на падпольных фабрыках унутры краіны”, удакладняе ведамства.

Супрацоўнікі Крымінальнай мытнай службы за першую палову 2025 года канфіскавалі 3,34 млн пачкаў нелегальных цыгарэт (за ўвесь 2024-ы — 4,76 млн пачкаў), іх кошт перавышае 15 млн еўра.

Акрамя таго, як адзначаецца, за шэсць месяцаў 56% цыгарэт канфіскавана ўнутры краіны (23% за ўвесь 2024-ы).

Раней паведамлялася, што за першую палову 2025 года ў Літве затрымана і канфіскавана больш за 805 тыс. пачкаў кантрабандных цыгарэт, дастаўленых з Беларусі па паветры.

У 2024 годзе і першай палове 2025-га было пачата 20 дасудовых расследаванняў па фактах перавозкі кантрабанды пры дапамозе метэазондаў або дронаў.

“Агулам 34 асобам прад’яўленыя абвінавачванні ў рамках дасудовага расследавання такога кшталту. Яшчэ адным значным вынікам гэтага года сталі дзесяць крымінальных спраў, якія ў цяперашні час разглядаюцца ці ўжо разгледжаныя ў судах”, — адзначаў партал навін Delfi са спасылкай на даныя літоўскай пракуратуры.

25 ліпеня стала вядома, што польскія мытнікі пры даглядзе трох грузавікоў, якія рухаліся з Расіі праз Латвію і Літву, выявілі на дне кардонных скрынак з цыбуляй і бураком беларускія цыгарэты без акцызных марак. Канфіскавана 5 млн цыгарэт. Нацыянальнае падатковае ўпраўленне Польшчы падкрэсліла, што калі б тавар трапіў на рынак, дзяржбюджэт Польшчы страціў бы амаль 7,5 млн злотых (каля 2 млн долараў).