Лукашэнка ўхваліў праект пагаднення з Непалам аб адмене віз для ўладальнікаў дыпламатычных, афіцыйных і службовых пашпартоў

5 жніўня, Позірк. Аляксандр Лукашэнка ўхваліў у якасці “асновы для правядзення перамоў” праект міжурадавага пагаднення з Непалам аб адмене віз для ўладальнікаў дыпламатычных, афіцыйных і службовых пашпартоў.

Адпаведны ўказ падпісаны 5 жніўня, паведамляе прэс-служба Лукашэнкі.

Згодна з дакументам, Міністэрства замежных спраў упаўнаважана на “правядзенне перамоў па праекце пагаднення” і “падпісанне дакумента пры дасягненні дамоўленасці ў межах ухваленага праекта”.

15 лютага 2024 года, прымаючы даверчыя граматы ад амбасадараў, Лукашэнка заявіў, што для развіцця сувязяў з Непалам “прыйшоў час больш эфектыўна задзейнічаць неабходны рэсурс”.

Ён прапанаваў пачаць з праектаў па мадэрнізацыі аграрнага сектара, прамысловасці і энергетычнага комплексу.

“Гатовыя дзяліцца ведамі і досведам у навукова-тэхнічнай сферы, навучаць вашых студэнтаў па запатрабаваных спецыяльнасцях”, — падкрэсліў тады прамоўца.

Дыпламатычныя адносіны паміж дзвюма краінамі былі ўстаноўленыя 19 ліпеня 1993 года.