Смяротнае ДТЗ у Слонімскім раёне — тры чалавекі загінулі, пяцёра шпіталізаваныя

10 жніўня, Позірк. У Слонімскім раёне (Гродзенская вобласць) адбылося дарожна-транспартнае здарэнне з чалавечымі ахвярамі, паведамляе Міністэрства ўнутраных спраў.

Адзначаецца, што 10 жніўня каля 18 гадзін на аўтадарозе М-11 “Слонім — Ліда — мяжа Літвы” “47-гадовы кіроўца аўтамабіля Renault, паводле папярэдняй інфармацыі, на закругленні дарогі выехаў на паласу сустрэчнага руху, дзе здзейсніў лабавое сутыкненне з Mercedes пад кіраваннем 48-гадовага мужчыны”.

“Абодва кіроўцы і 47-гадовая жанчына — пасажыр Renault — загінулі. Пяць чалавек, у тым ліку дзеці, шпіталізаваныя”, — гаворыцца ў паведамленні.

На месцы здарэння працуюць супрацоўнікі ДАІ, МНС, следча-аператыўная група.

Паведамляецца, што паводле распараджэння кіраўніка МУС Івана Кубракова “для ўстанаўлення прычын і ўмоў здарэння” на месца “выбыў часова выконваючы абавязкі па пасадзе начальніка ГАДАІ МУС Андрэй Гаркуша”.

Раней МУС паведаміла, што 9 жніўня ў ДТЗ на тэрыторыі Беларусі загінулі чатыры чалавекі — “кіроўца аўтамабіля, непаўнагадовы матацыкліст і два пешаходы”.

“Дзевяць чалавек траўмаваныя, уключаючы дзіця. Прычынамі дарожных аварый сталі невыкананне ўстаноўленай хуткасці, небяспечныя манеўры — абгон і выезд на паласу сустрэчнага руху, раптоўны выхад пешахода на праезную частку без святлоадбівальных элементаў”, — адзначыла ведамства.

Таксама паведамлялася пра гібель чалавека 10 жніўня ў ДТЗ у Аршанскім раёне (Віцебская вобласць).