Лукашэнка паразмаўляў па тэлефоне з Трампам, той назваў яго “паважаным прэзідэнтам” (дапоўнена)

15 жніўня, Позірк. Адбылася тэлефонная размова паміж прэзідэнтам ЗША Дональдам Трампам і Аляксандрам Лукашэнкам, паведаміла 15 жніўня прэс-служба апошняга.

“Лідары дзвюх краін абмеркавалі пытанні двухбаковага парадку дня, рэгіянальную тэматыку і сітуацыю ў гарачых пунктах, уключаючы Украіну. Дасягнута дамоўленасць прадоўжыць кантакты. Прэзідэнт Беларусі запрасіў Дональда Трампа з сям’ёй у Мінск, і гэта запрашэнне было прынята”, — гаворыцца ў рэлізе.

Трамп у сваёй сацыяльнай сетцы TruthSocial пацвердзіў факт гутаркі з “паважаным прэзідэнтам Беларусі Аляксандрам Лукашэнкам”, назваўшы яе “выдатнай”.

Паводле яго, мэтай званка было выказаць Лукашэнку “падзяку за вызваленне 16 зняволеных”.

“Мы таксама абмяркоўваем вызваленне яшчэ 1.300 зняволеных. Наша гутарка была вельмі плённай. Мы абмеркавалі мноства тэм, уключаючы візіт прэзідэнта [Расіі Уладзіміра] Пуціна на Аляску”, — паведаміў кіраўнік Белага дома.

У заключэнні ён адзначыў, што “з нецярпеннем” чакае “сустрэчы з прэзідэнтам Лукашэнкам у будучыні”.

Цягам 2024 года ў Беларусі не адбылося значных зменаў у галіне правоў чалавека, гаворыцца ў краінавым дакладзе Дзяржаўнага дэпартамента ЗША, які быў апублікаваны 13 жніўня.

Сустрэча Трампа з Пуціным адбудзецца 15 жніўня.