У новым навучальным годзе колькасць школьнікаў, якія атрымліваюць бясплатнае харчаванне, зменшыцца да 65%

26 жніўня, Позірк. На 5 працэнтных пунктаў зменшылася доля школьнікаў, якія ў новым навучальным годзе атрымаюць бясплатнае харчаванне, вынікае са слоў начальніка аддзела па арганізацыі харчавання Акадэміі адукацыі Міністэрства адукацыі Люцыі Міхальчук.

Паводле яе слоў, бясплатнае харчаванне атрымае больш за 65% навучэнцаў. У 2024 годзе яна паведамляла, што доля такіх дзяцей склала каля 70%.

Бясплатнае харчаванне ў школах прадастаўляецца адзін, два ці тры разы. Усім вучням малодшай школы (1–4 класы) прадастаўляецца бясплатны сняданак. Усе сельскія школьнікі 1–11 класаў атрымліваюць аднаразовае бясплатнае харчаванне за кошт бюджэту. Трохразовае бясплатнае харчаванне атрымліваюць дзеці са шматдзетных, малазабяспечаных сем’яў, дзеці-інваліды.

Усяго ў Беларусі 17 катэгорый дзяцей, якія маюць права на бясплатнае харчаванне ў той ці іншай форме.

Міхальчук падкрэсліла, што пры платным харчаванні бацькі кампенсуюць толькі кошт прадуктаў харчавання.

Паводле яе сцвярджэння, пакуль харчаванне не падаражэла ў параўнанні з мінулым навучальным годам. У 2024–2025 годзе кошт харчавання склаў: аднаразовае харчаванне дзяцей 6–10 гадоў — 2,29 рубля ў выпадку, калі ежа прыгатаваная ў школе, і 2,98 рубля — калі іншай арганізацыяй; для навучэнцаў 11–18 гадоў — 2,70 і 3,51 рубля адпаведна.

Паводле слоў дырэктара дзяржаўнага прадпрыемства “Камбінат школьнага харчавання Мінска” Людмілы Крупскай, у двухтыднёвыя рацыёны школьнага меню на восеньскі перыяд уключана 137 страў.

Падчас падрыхтоўкі да новага навучальнага года камбінат набывае кухонны інвентар, сталовы посуд, прыборы, шклянкі больш чым на 700 тыс. рублёў, спецыяльнае санітарнае адзенне — на 3,5 тыс., мыйныя, чысцячыя і дэзінфікуючыя сродкі — больш чым на 45 тыс., сказала Крупская.

Гаворачы аб праблемах харчавання школьнікаў, загадчыца Мінскага гарадскога цэнтра здароўя Сняжана Каўрыга згадала, што паводле даных цэнтра, каля 30–40% навучэнцаў не снедаюць і прыходзяць у школу нашча.

Яна заклікала бацькоў прытрымлівацца правілаў харчавання дзяцей адпаведна ўзросту і карміць іх сняданкам, каб “выключыць галодную непрытомнасць да трэцяга ўрока”.