З Беларусі ў Польшчу залятаюць БПЛА, тэлефоны салдат на мяжы ўзломваюць — адстаўны генерал
5 верасня, Позірк. Нелегальную міграцыю праз беларуска-польскую мяжу разам з іншым уздзеяннем службаў Мінска можна ахарактарызаваць як “адну іх форм вядзення ваенных дзеянняў”, заявіў кіраўнік арганізацыі “Academy Defence 24”, генерал у адстаўцы Яраслаў Грамадзіньскі 4 верасня на штогадовым “Эканамічным форуме” ў Карпачы (Польшча).
“Учора ноччу заляцелі два беспілотнікі на тэрыторыю Польшчы і пакінулі [яе] — добра, што мы бачым”, — сказаў ён (пра сітуацыю ў той жа дзень паведаміў на прэс-канферэнцыі начальнік Генштаба ВС Польшчы Веслаў Кукула, не ўдакладніўшы паходжанне БПЛА. — “Позірк”.).
Які камандаваў 18-й механізаванай дывізіяй ВС Польшчы, прыцягнутай да аховы меж у момант пачатку міграцыйнага крызісу ў 2021 году, Грамадзіньскі адзначыў, што “гібрыдная вайна ўздзейнічае не на салдата, а на асяроддзе, у якой ён дзейнічае”.
“Гэта значыць, яна імкнецца да данясення дэзінфармацыі, сварак у лакальных супольнасцях, у асяроддзі ваенных і службаў”, — дадаў генерал.
Паводле яго, у гэтым кантэксце важна таксама казаць аб абароне кіберпрасторы: “Беларусы праводзяць актыўны ўзлом нашых <…> тэлефонаў уздоўж мяжы, і гэта вельмі небяспечна. У нас былі выпадкі, што салдаты страцілі [доступ] да банкаўскага рахунку, таму што быў узламаны дадатак у тэлефоне”.
Тое, што адбываецца, спікер назваў моцным выклікам і падкрэсліў, што ў сувязі з гэтым “сёння ўспрыманне мяжы зусім іншае, чым раней”.
Міграцыйны крызіс на мяжы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай” Масквы і Мінска.
З пачатку верасня суседнія краіны Еўрасаюза зафіксавалі 425 спроб пранікнення на сваю тэрыторыю з Беларусі (Польшча — 293, Латвія — 71), з пачатку года — 34.470 (Польшча — 24.083, Латвія — 9.253). Год таму актыўнасць была меншай: 366 спроб за тры дні верасня, 28.742 — з пачатку студзеня.
Аб падзенні і выбуху лятальнага аб’екта, як мяркуецца, БПЛА ў в. Асіны Люблінскага ваяводства паведамлялася 20 жніўня. Днём пазней у ваяводскай пракуратуры заявілі аб “вельмі высокай верагоднасці”, што аб’ект прыляцеў з Беларусі.
