АПК выказаў “поўны давер і падтрымку” Латушку ў сітуацыі з абвінавачваннямі ад імя дэлегата КР Карпушонак
5 верасня, Позірк. Аб’яднаны пераходны кабінет (АПК) “пацвярджае свой поўны давер і падтрымку” намесніку кіраўніка АПК Паўлу Латушку ў сітуацыі з абвінавачваннямі, высунутымі ў яго адрас ад імя дэлегата Каардынацыйнай рады (КР) Вольгі Карпушонак, гаворыцца ў апублікаванай 5 верасня заяве кабінета.
“На гэты момант не прадстаўлена ніякіх фактаў або доказаў у падтрымку гэтых абвінавачанняў, — адзначана ў дакуменце. — Таксама няма магчымасці праверыць, ці былі гэтыя заявы зробленыя добраахвотна, без знешняга ціску або ўплыву”.
АПК заявіў, што разглядае публікацыі Карпушонак як частку кампаніі спецслужбаў рэжыму Аляксандра Лукашэнкі “па дыскрэдытацыі беларускіх дэмакратычных сіл і іх прадстаўнікоў”, і заклікаў грамадзянскую супольнасць і міжнародных партнёраў “крытычна ставіцца да такіх інфармацыйных атак”.
30 жніўня дэлегат КР (фракцыя “Хопіць баяцца!”), экс-адвакат Карпушонак абвінаваціла намесніка кіраўніцы Аб’яднанага пераходнага кабінета, кіраўніка Народнага антыкрызіснага ўпраўлення Паўла Латушку ў сексуальных дамаганнях.
1 верасня яна паведаміла пра гатоўнасць “пацвярджаць свае словы канкрэтнымі фактамі”.
Латушка назваў гэтыя абвінавачанні “хлуснёй і паклёпам”. Ён паведаміў пра намер звярнуцца ў праваахоўныя органы з заявай пра паклёп, а таксама падрыхтаваць грамадзянскі пазоў да Карпушонак аб абароне гонару і годнасці і патрабаваць абвяржэння.
У НАУ заявілі, што публікацыя “чарговага паклёпу Вольгі Карпушонак” — спецаперацыя КДБ, скіраваная на дыскрэдытацыю Латушкі.
3 верасня ў сеціве быў размешчаны скан ліста нібыта ад імя Карпушонак прэзідэнту Парламенцкай асамблеі Савета Еўропы (ПАСЕ), у якім яна сцвярджае, што “стала ахвярай сексуальных дамаганняў” з боку Латушкі. У адказ той заявіў, што дзеянні Карпушонак скіраваныя на ліквідацыю КР і пазбаўленне яе міжнароднага прызнання. Латушка і Карпушонак з’яўляюцца членамі дэлегацыі КР у ПАСЕ.
4 верасня ў КС паведамілі, што сёлета з сакавіка па жнівень Карпушонак выпампавала з агульнага сховішча файлаў больш за 70 працоўных дакументаў. Адзначалася, што “гэтыя дакументы даступныя для ўсіх дэлегатаў КР і не ўтрымліваюць нейкіх сакрэтных звестак, аднак актыўнасць нетыповая: да сакавіка 2025 года Вольга не выпампоўвала ніводнага дакумента, але пасля сакавіка — выпампоўвала ўсе дакументы, якія публікаваліся для членаў КР”.
У цяперашні час месцазнаходжанне Карпушонак невядомае.
У Каардынацыйнай радзе прапануюць увесці працэдуру праверкі на паліграфе
5 верасня, Позірк. Фракцыя "Воля" ў Каардынацыйнай радзе (КР) і камісія КР па нацыянальнай і рэгіянальнай бяспецы (КНРБ) "са жніўня 2024 года прапануюць увесці працэдуру" праверкі на паліграфе для дэлегатаў і адказных супрацоўнікаў, гаворыцца ў распаўсюджанай 5 верасня заяве гэтых …
