34-гадовы беларус затрыманы ў Польшчы па падазрэнні ў вытворчасці наркотыкаў

16 верасня, Позірк. 34-гадовы грамадзянін Беларусі 11 верасня ўзяты пад варту па падазрэнні ў вытворчасці наркотыкаў у горадзе Казеніца (Мазавецкае ваяводства, Польшча), паведамляе мясцовая паліцыя.

Разам з ім затрымалі двух грамадзян Польшчы.

Адзначаецца, што ў кватэры, у якой знаходзіліся падазраваныя, выяўлена амаль 5 кг канабісу і марыхуаны на суму 250 тыс. злотых (каля 69 тыс. долараў).

Таксама быў канфіскаваны кантэйнер з іншымі наркотыкамі, склад рэчываў якіх даследуецца.

Мужчыны падазраюцца ў вырабе і перапрацоўцы псіхаактыўных рэчываў у буйным аб’ёме. Ім, як паведамляецца, можа пагражаць да 20 гадоў пазбаўлення волі.