У Маладзечанскім раёне прайшлі зборы па тэраабароне

22 верасня, Позірк. Аб правядзенні ў Маладзечанскім раёне (Мінская вобласць) аднадзённых збораў па тэрытарыяльнай абароне паведаміла 22 верасня прэс-служба Міністэрства абароны.

Яны адбыліся пад кіраўніцтвам намесніка кіраўніка аблвыканкама Аляксандра Ільясевіча.

У мерапрыемстве прынялі ўдзел начальнік упраўлення тэрытарыяльнай абароны — намеснік начальніка Генеральнага штаба Андрэй Краўчанка і старшыні раённых (гарадскога) выканаўчых камітэтаў, якія займаюцца пытаннямі тэрытарыяльнай абароны Мінскай вобласці.

Мэтай названа выпрацоўка “адзіных падыходаў у службовых асоб мясцовых выканаўчых і распарадчых органаў у ходзе падрыхтоўкі і вядзення тэрытарыяльнай абароны”.

Як паведамляў “Позірк”, зборы з ваеннаабавязанымі, прызначанымі для камплектавання тэрытарыяльных войскаў Маладзечанскага раёна і Кастрычніцкага раёна Мінска, пачаліся 2 верасня.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама ваеннымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.

Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны.