Лукашэнка даручыў кіраўніку Нацбанка Галоўчанку аналізаваць і паведамляць пра сітуацыю ў эканоміцы
23 верасня, Позірк. Аналізаваць сітуацыю ў эканоміцы і паведамляць пра яе Аляксандру Лукашэнку належыць старшыні праўлення Нацыянальнага банка Раману Галоўчанку. Пра адпаведнае даручэнне кіраўніку рэгулятара беларускі палітык заявіў 23 верасня на сустрэчы з прэм’ер-міністрам Аляксандрам Турчыным.
“Хачу, каб вы ведалі, каб не было тут ніякай рэўнасці, — цытуе спікера яго прэс-служба. — Я папрасіў былога прэм’ера (былых жа не бывае) — малады чалавек, адукаваны, дасведчаны, каб ён (гаворка пра папярэдніка Турчына, 52-гадовага Галоўчанку, які ўзначальваў урад да 10 сакавіка 2025 года. — “Позірк”.) стварыў групу ў сябе. А такія людзі маюцца [у рэгулятара] — разумныя, пісьменныя, абазнаныя ў эканоміцы”.
Іх задача, паводле слоў Лукашэнкі, заключаецца ў дапамозе Камітэту дзяржаўнага кантролю: “Каб яны мяне інфармавалі і аналізавалі сітуацыю ў эканоміцы. А па грошах жа бачна ўсё. Ты ж эканаміст, разумееш”.
“Таму без усялякіх крыўдаў. Я Галоўчанку папрасіў: “Сфармуй мне такую групу ў Нацыянальным банку, ты яе кіраўнік і аб’ектыўна мне павінен аналізаваць і дакладваць. Таму што маё ўражанне — гэта адно. А то — адмыслоўцы”, — заявіў палітык.
Паводле яго слоў, інфармацыя ад гэтай групы не будзе закрытай: “Прэм’ер павінен яе бачыць і будзе бачыць”.
Як паведамляў “Позірк”, у экспрэс-аналізе даследчага цэнтра BEROC гаворыцца, што эфектыўнасць інвестыцый у Беларусі “па-ранейшаму выклікае пытанні”, паколькі рост капітальных укладанняў “не суправаджаўся супастаўным нарошчваннем выпуску”.
Разам з тым аналітыкі не выключаюць, што на фоне прыкметнага адставання росту ВУП ад плана ўрада Нацбанк “узмоцніць стымуляванне крэдытавання фірм банкамі пераважна праз прымяненне адміністрацыйнага рэсурсу”.
Гл. таксама:
Экспарт сохне, імпарт пухне. Гэтыя нажніцы падразаюць беларускую эканоміку (на рускай мове)
