Рэпрэсіі ў дачыненні да былых палітзняволеных працягваюцца і пасля вызвалення — праваабаронца Судаленка
26 верасня, Позірк. Рэпрэсіі ў дачыненні да былых палітычных вязняў фактычна працягваюцца і пасля вызвалення, такую думку выказаў 26 верасня ў Варшаве падчас панэльнай дыскусіі на II Кангрэсе па палітзняволеных у Беларусі #WithoutJustCause праваабаронца цэнтра “Вясна”, юрыст, экс-палітзняволены Леанід Судаленка.
У прыватнасці, адзначыў ён, тэлефонныя размовы экс-палітвязняў праслухоўваюцца. Судаленка распавёў, што пасля вызвалення супрацоўнікі Крымінальна-выканаўчай інспекцыі два разы на дзень правяралі яго месцазнаходжанне, яму быў забаронены выезд не толькі за межы краіны, але і з Гомеля, дзе ён жыў.
Праваабаронца таксама нагадаў, што цяпер заканадаўства дазваляе пазбаўляць чалавека за “экстрэмісцкія злачынствы” грамадзянства, атрыманага паводле права нараджэння ў Беларусі. Хаця гэтая працэдура “яшчэ цалкам не запрацавала”, з улікам таго, што ў адасланых 11 верасня за мяжу палітвязняў забралі дакументы, “стрэльба на сцяне можа пачаць страляць”, і, магчыма, хутка такіх людзей пачнуць пазбаўляць грамадзянства, выказаў думку юрыст.
Леанід Судаленка — былы палітвязень. У рамках першай крымінальнай справы ён быў затрыманы 18 студзеня 2021 года, абвінавачаны ў “арганізацыі і падрыхтоўцы дзеянняў, што груба парушаюць грамадскі парадак”, “падрыхтоўцы асоб для ўдзелу ў такіх дзеяннях, а таксама іх фінансаванні або іншым матэрыяльным забеспячэнні” (ч. 1 і 2 арт. 342 КК).
3 лістапада 2021 года суд Цэнтральнага раёна Гомеля (суддзя Сяргей Салоўскі) прыгаварыў яго да 3 гадоў зняволення ва ўмовах агульнага рэжыму. Ён вызваліўся пасля адбыцця пакарання ў ліпені 2023 года і пакінуў краіну.
17 чэрвеня 2024 года Гомельскі абласны суд завочна прыгаварыў Судаленку да 5 гадоў пазбаўлення волі ва ўмовах строгага рэжыму паводле ч. 1 і 2 арт. 3614 КК (садзейнічанне экстрэмісцкай дзейнасці). Суд таксама пастанавіў спагнаць з яго штраф у памеры 650 базавых велічынь (на той момант 26 тыс. рублёў).
У красавіку гэтага года стала вядома, што на праваабаронцу заведзеныя яшчэ тры крымінальныя справы.
