Паліцыя Польшчы затрымала беларуса і паляка, якія падазраюцца ў выкраданні чалавека

3 кастрычніка, Позірк. Супрацоўнікі паліцыі польскага горада Закапанэ затрымалі беларуса і паляка, якія, як сцвярджаецца, выкралі 24-гадовага жыхара Лодзінскага ваяводства і трымалі яго ў закладніках, паведаміла польскае выданне Wiadomości са спасылкай на праваахоўнікаў.

Сцвярджаецца, што мужчыны патрабавалі ад сям’і выкрадзенага вярнуць доўг, здзекаваліся з чалавека, марылі яго голадам, “заткнулі яму рот затычкаю і перавозілі ў багажніку”.

Паводле даных выдання, у аперацыі ўдзельнічалі паліцыянты з Закапанэ і Малапольскага ваяводства. Паведамляецца, што паліцыя ідэнтыфікавала аўтамабіль, у якім перавозілі закладніка. Калі машына спынілася перад крамай у населеным пункце Касцеліска, праваахоўнікі “правялі жорсткую аперацыю па затрыманні”.

У машыне, як заяўлена, былі 36-гадовы грамадзянін Беларусі, 30-гадовы жыхар Татроўскага павета Польшчы і выкрадзены мужчына.

Суд пастанавіў узяць падазраваных пад варту на 3 месяцы. Ім пагражае да 25 гадоў пазбаўлення волі.