Лукашэнка пра сітуацыю ў птушкагадоўлі: падзёж — мільёны галоў, ветэрынараў не хапае, парушаюцца тэхрэгламенты
3 кастрычніка, Позірк. За мінулы год падзёж птушкі на этапе вырошчвання і адкорму склаў 22,5 млн галоў, заявіў Аляксандр Лукашэнка 3 кастрычніка падчас паездкі ў Салігорскі раён (Мінская вобласць).
Палітык, словы якога прыводзіць яго прэс-служба, падкрэсліў, што за восем месяцаў 2025 года падзёж склаў амаль 15 млн галоў. У асобных абласцях назіраецца значны рост падзяжу: у Гродзенскай — на 20%, Мінскай — на 16%, Віцебскай — на 15%.
“На жаль, пагалоўе павялічваецца нізкімі тэмпамі (у 2024 годзе ўсяго на 3% да ўзроўню 2023 года)”, — канстатаваў Лукашэнка.
Паводле яго слоў, прычыны “банальныя”: “Незбалансаваная кармавая база, састарэлая інфраструктура, але часцей за ўсё безгаспадарчасць і разгільдзяйства”.
У прыватнасці, на птушкафабрыцы “Заходняя” ў Столінскім раёне (Брэсцкая вобласць) птушку кармілі камбікормам са скончаным тэрмінам прыдатнасці.
“Дагэтуль выкрываюцца выпадкі парушэння рэжыму: пранос работнікамі асабістых рэчаў на тэрыторыю, праходжанне супрацоўнікаў у чыстую зону ў абыход санпрапускніка, а таксама праца без спецадзення, — адзначыў Лукашэнка. — У некаторых птушкагадоўчых арганізацыях не выключаная магчымасць траплення сінантропнай птушкі. Не ў поўнай меры праводзяцца мерапрыемствы па барацьбе з грызунамі. Элементарнага не робім”.
Яшчэ адной праблемай ён назваў сітуацыю з вакцынацыяй. Палітык сцвярджае, што на асобных аб’ектах, як высветлілася, не было неабходнай колькасці сродкаў дэзінфекцыі, медыкаментаў, там не выконвалася схема лячэбна-прафілактычных мерапрыемстваў. Акрамя таго, дапускаюцца парушэнні тэхналагічных рэгламентаў і ветэрынарных правіл.
“Шмат у чым гэта абумоўлена кадравым дэфіцытам, паколькі птушкафабрыкі ўкамплектаваныя ветэрынарнымі і заатэхнічнымі спецыялістамі на 90%, — адзначыў Лукашэнка. — Падрыхтавалі спецыялістаў — яны павінны працаваць там, для чаго іх рыхтавалі. І гэту тэму трэба закрыць. Трэба вырашыць <…> раз і назаўсёды гэтую праблему”.
Варта адзначыць, што 22 верасня 2023 года ў Салігорску на семінары-нарадзе пра развіццё жывёлагадоўлі Лукашэнка звяртаў увагу на сітуацыю з падзяжом буйной рагатай жывёлы (БРЖ; каровы, быкі ды інш.). Нягледзячы на гэта, асаблівых пазітыўных вынікаў афіцыйная статыстыка не публікуе. Больш за тое, падзенне працягваецца.
Згодна з праведзеным “Позіркам” аналізам даных Белстата, пагалоўе БРЖ на канец жніўня 2025 года склала 3.957.369 — на 2,6% менш, чым годам раней (4.061.138). Колькасць кароў скарацілася да 1.368.681 (1.384.867; -1,2%). Пагалоўе свіней зменшылася да 2.024.618 (2.246.191; -9,9%).
На фоне пагаршэння сітуацыі з пагалоўем БРЖ на выязной нарадзе па сельскай гаспадарцы 17 чэрвеня ў Мінскім раёне Лукашэнка заявіў, што за апошнія гады ўлады “намацалі, якім шляхам развівацца ў жывёлагадоўлі”.
Паводле яго слоў, усяго ў краіне не больш за траціну сельгаспрадпрыемстваў, на якія “трэба звярнуць пільную ўвагу”, астатнія працуюць альбо “ў цэлым нядрэнна”, альбо “на высокім узроўні”.
29 траўня на першым пасяджэнні ўрада новага складу Лукашэнка паскардзіўся, што падзёж жывёлы “дасягнуў гістарычнага максімуму”.
