Двое пажылых жыхароў Магілёўскай вобласці затрыманыя за захоўванне і збыт зброі

6 кастрычніка, Позірк. Двое пажылых жыхароў Магілёўскай вобласці затрымана за захоўванне і збыт зброі, паведамляе прэс-служба Міністэрства ўнутраных спраў.

Паводле сцвярджэння ведамства, 68-гадовы мужчына “незаконна прадаў пісталет Макарава свайму знаёмаму”. Следчыя распачалі па гэтым факце крымінальную справу. Падчас разбіральніцтва высветлілася, што 71-гадовы пакупнік “займаўся аналагічнай супрацьпраўнай дзейнасцю”.

Падчас вобшукаў у фігурантаў знойдзена і вынята шэсць пісталетаў, рэвальвер, пісталет-кулямёт, ручная асколачная граната, трацілавая шашка, складныя часткі зброі, больш за 800 боепрыпасаў.

Прызначаныя экспертныя даследаванні, “дзеянням затрыманых будзе дадзеная прававая ацэнка”, заяўляе МУС.

Як паведамляў “Позірк”, 6–10 кастрычніка ў Беларусі праходзіць чарговы этап аперацыі “Арсенал”, скіраваны на “прадухіленне парушэнняў заканадаўства ў сферы абароту зброі”. Тыя, хто добраахвотна здаў зброю і боепрыпасы, вызваляюцца ад крымінальнай і адміністрацыйнай адказнасці.

Паводле даных МУС, ад пачатку 2025 года да 3 кастрычніка з абароту вынята больш як 480 адзінак незарэгістраванай зброі і амаль 53 тыс. розных боепрыпасаў.

Добраахвотна здадзена больш за 300 адзінак зброі і каля 19 тыс. боепрыпасаў.