Чатыры супрацоўнікі “Беларуськалія” шпіталізаваныя з хімічнымі апёкамі, на прадпрыемства накіраваныя брыгады хуткай дапамогі (дапоўнена)
31 кастрычніка, Позірк. Пра “інцыдэнт” на салiгорскім прадпрыемстве “Беларуськалій” (Мінская вобласць) паведаміла 31 кастрычніка Міністэрства аховы здароўя.
На прадпрыемства накіравана медыцынская брыгада — камбустіёлаг, траўматолаг і рэаніматолаг для аказання дапамогі пацярпелым, таксама туды выехалі чатыры брыгады хуткай медыцынскай дапамогі.
“Пацярпелі чатыры работнікі прадпрыемства: усе яны з хімічнымі апёкамі, камбінаванымі траўмамі знаходзяцца ў Салігорскай ЦРБ”, — гаворыцца ў паведамленні.
Адзначаецца, што “органамі дзяржсаннагляду праводзіцца маніторынг атмасфернага паветра на вытворчай пляцоўцы”.
Паводле паведамлення Міністэрства па надзвычайных сітуацыях, адбыўся разрыў пустой ёмістасці з-пад салянай кіслаты на адкрытай пляцоўцы цэха мембраннага электролізу. На месцы здарэння працуе восем адзінак тэхнікі МНС.
3 лістапада 2023 года на 2-м рудаўпраўленні прадпрыемства пацярпелі пяць работнікаў рамонтнай брыгады электраслесараў. У здарэнні абвінавачаны 44-гадовы дзяжурны майстар “Беларуськалія”.
30 траўня 2021 года на рудніку “Беларуськалія” загінуў рабочы, паведамляў афіцыйны тэлеграм-канал прадпрыемства.
Як паведаміў на прэс-канферэнцыі 24 красавіка дырэктар дэпартамента дзяржаўнай інспекцыі працы Міністэрства працы і сацыяльнай абароны Аляксандр Семіч, у 2024 годзе траўмы на вытворчасці атрымалі 1.849 чалавек — на аднаго менш, чым у 2023-м (1.850). Колькасць загінулых скарацілася за год на 10,3% (са 117 да 105).
Летась 17 пацярпелых былі маладзейшыя за 18 гадоў, двое з іх загінулі.
74% сярод усіх пацярпелых — мужчыны, сярод загінулых іх 96,2%. Такая прапорцыя “назіраецца ўжо не першы год”. Гэта, на думку Семіча, сведчыць пра тое, што на працы “жанчыны больш спакойныя і дысцыплінаваныя”. “Партрэт загінулага — мужчына 44–45 гадоў”, — адзначыў прадстаўнік Мінпрацы.
У пяцёрку самых траўманебяспечных прафесій уваходзяць кіроўца аўтамабіля, слесар, падсобны рабочы, трактарыст, жывёлавод.
