Польшча адкрые пагранпераходы з Беларуссю ў другой палове лістапада, перакананы кіраўнік МУС Літвы

10 лістапада, Позірк. Польшча адкрые два пераходы на мяжы з Беларуссю ў другой палове лістапада, заявіў 10 лістапада ў эфіры радыё LRT міністр унутраных спраў Літвы Уладзіслаў Кандратовіч.

“Я на мінулым тыдні размаўляў з міністрам унутраных спраў Польшчы, — цытуе чыноўніка партал навін Delfi. — Яны планавалі адкрыць гэтыя пункты 1 лістапада, але з салідарнасці з Літвой гэтага не зрабілі. Але, хутчэй за ўсё, гэта адбудзецца пасля 15 лістапада, пасля 20-га. Думаю, гэта дакладна адбудзецца”.

5 лістапада міністр унутраных спраў і адміністрацыі Польшчы Марцін Кервіньскі пацвердзіў, што Польшча была гатовая да адкрыцця двух пагранпераходаў на мяжы з Беларуссю “на мінулым тыдні”, аднак яно было адкладзенае праз “чарговыя правакацыі Беларусі на літоўскай мяжы”.

У цяперашні час дзяржустановы Польшчы зачыненыя ў сувязі з Днём незалежнасці, які будзе адзначацца 11 лістапада.

Напрыканцы мінулага месяца Літва сутыкнулася з неаднаразовымі выпадкамі масавага прылёту з Беларусі паветраных шароў і метэазондаў, якія выкарыстоўваюць кантрабандысты для перакідвання цыгарэт. Рэагуючы на ​​гэта, Вільнюс некалькі разоў часова закрываў пункты пропуску, а 29 кастрычніка літоўскі ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня паводле мінскага часу) з магчымасцю падаўжэння.

28 кастрычніка прэм’ер-міністр Польшчы Дональд Туск заявіў пра планы адкрыць два пункты пропуску на мяжы з Беларуссю — Баброўнікі (Бераставіца; закрыты ў лютым 2023 года пасля асуджэння актывіста неафіцыйнага Саюза палякаў Беларусі, журналіста Анджэя Пачобута) і Кузніца (Брузгі; закрыты ў лістападзе 2021 года праз міграцыйны крызіс).

Аднак праз некалькі дзён, 30 кастрычніка, Кервіньскі паведаміў, што Варшава адклала адкрыццё гэтых пагранпераходаў на некалькі тыдняў.