З 2020 года ў Беларусі ліквідавана не менш за 2.053 НКА — Lawtrend
4 жніўня, Позірк. З 2020 года да канца ліпеня 2026-га ў Беларусі ліквідавана не менш за 2.053 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.
На канец чэрвеня колькасць ліквідаваных арганізацый складала 2.044, траўня — 2.033, красавіка — 2.022, сакавіка — 2.020, лютага — 2.012, студзеня — 1.995; снежня 2025 года — 1.990, 2024-га — 1.891, 2023-га — 1.509.
Паводле інфармацыі Lawtrend, з 2021 года не менш за 1.249 НКА былі прымусова ліквідаваныя альбо знаходзяцца ў працэсе прымусовай ліквідацыі, яшчэ не менш за 804 некамерцыйных арганізацый прынялі рашэнне аб самастойнай ліквідацыі.
У ліпені стала вядома аб рашэннях як найменей чатырох НКА аб самастойнай ліквідацыі (трох грамадскіх аб’яднанняў і аднаго фонду). Суды вынеслі рашэнні аб прымусовай ліквідацыі яшчэ трох грамадскіх аб’яднанняў і дзвюх недзяржаўных устаноў.
Праваабаронцы адзначаюць, што сітуацыя са свабодай асацыяцый у Беларусі ў ліпені 2026 года па-ранейшаму характарызавалася сістэмным ціскам на арганізацыі грамадзянскай супольнасці і іх прадстаўнікоў. Ключавымі тэндэнцыямі месяца сталі “скарачэнне інстытуцыйнай прасторы сектара”, пераслед актывістаў “па антыэкстрэмісцкім заканадаўстве”, пашырэнне практыкі прызнання рэсурсаў “экстрэмісцкімі матэрыяламі” і прымяненне спецыяльнай (завочнай) вытворчасці ў дачыненні да грамадзян, якія знаходзяцца за мяжой.
Асобная ўвага ў аглядзе нададзена ўзмацненню адміністрацыйнага і фінансавага кантролю за юрыдычнымі асобамі. Адзначаецца, што “атрымала развіццё практыка прыпынення аперацый па рахунках арганізацый, якія адсутнічаюць па месцы рэгістрацыі (уключаючы некамерцыйны сектар)”, а “прынятыя ў ліпені заканадаўчыя змены дадаткова пашырылі паўнамоцтвы дзяржорганаў па прыпыненні дзейнасці юрыдычных асоб, аперацый па рахунках і электронных кашальках”.
Акрамя таго, праваабаронцы фіксуюць пашырэнне практыкі прымянення заканадаўства аб масавых мерапрыемствах да “непалітычных формаў калектыўнай актыўнасці”. Адміністрацыйнаму і сілавому пераследу ў ліпені падвяргаліся “ўдзельнікі культурных, забаўляльных і нефармальных мерапрыемстваў”, а таксама ініцыятыў, накіраваных на захаванне беларускай культуры і ідэнтычнасці.
