Лясны пажар у Жыткавіцкім раёне ўсё яшчэ не патушаны

4 жніўня, Позірк. Лясны пажар у Жыткавіцкім раёне (Гомельская вобласць) усё яшчэ не патушаны, вынікае з паведамлення Міністэрства па надзвычайных сітуацыях.

4 жніўня да тушэння пажару дадаткова быў прыцягнуты верталёт Мі-8 авіяцыі МНС.

Адзначаецца, што за два дні верталёты МНС ажыццявілі 115 скідаў вады (каля 290 тон), іх агульны налёт склаў 19 гадзін.

Авіяцыя МНС скончыла працу на гэтым участку, гаворыцца ў паведамленні.

“Далейшы маніторынг і праліўка лакальных ачагоў будзе працягнутая мясцовымі наземнымі сіламі да поўнай ліквідацыі пажару”, — паведамілі ў ведамстве.

3 жніўня паведамлялася, што лясны пажар у Жыткавіцкім раёне лакалізаваны. На той момант, як паведамляла МНС, плошча пажару складала 5 гектараў. Верталёт МНС за 18 заходаў выліў на паражаную тэрыторыю 54 тоны вады.

Жыткавіцкі раён знаходзіцца ў заходняй частцы вобласці, а таксама адносна недалёка ад мяжы з Украінай.