Да пяці гадоў зняволення прыгавораны віноўнік студзеньскага ДТЗ пад Мінскам з гібеллю 25-гадовай жанчыны і трохгадовага дзіцяці

4 жніўня, Позірк. Суд Мінскага раёна вынес прыгавор па крымінальнай справе аб аўтааварыі, у якой загінулі 25-гадовая жанчына і трохгадовае дзіця.

Як адзначаецца ў рашэнні, мужчына прызнаны вінаватым паводле ч. 3 арт. 317 КК (парушэнне правілаў дарожнага руху, якое пацягнула па неасцярожнасці смерць двух або больш асоб).

Паведамляецца, што фігурант павінен выплаціць 60 тыс. рублёў маці загінулай жанчыны (бабулі дзіцяці) у якасці кампенсацыі маральнай шкоды. Таксама ён на пяць гадоў пазбаўлены права кіравання транспартнымі сродкамі.

Згодна з заключэннем суда, у момант аварыі 34-гадовы жыхар Мінска кіраваў легкавым аўтамабілем БМВ 518i з няспраўнай тармазной сістэмай. Аб няспраўнасці, як адзначаецца, мужчыну было дакладна вядома.

“Рухаючыся па дарозе Паперня — Радашковічы ў бок Мінска з хуткасцю каля 90 км/г, кіроўца не ўлічыў стан аўтамабіля, мокрае заснежанае дарожнае пакрыццё і закругленне дарогі. Каля вёскі Казекава Мінскага раёна машына выехала на заснежаную абочыну, пасля чаго яе занесла на паласу сустрэчнага руху, дзе здарылася сутыкненне з сустрэчным БМВ X3”, — гаворыцца ў рашэнні.

Абвінавачаны прызнаў віну ў судзе. Прысуд не ўступіў у законную сілу і можа быць абскарджаны.

Аварыя адбылася 3 студзеня 2026 год каля 12.55 на 10-м кіламетры аўтадарогі Н-8964 Паперня — Радашковічы.

Тады паведамлялася, што кіроўца БМВ 518i, рухаўся ў кірунку аграгарадка Юзуфава, выехаў на паласу сустрэчнага руху, дзе “здзейсніў сутыкненне з аўтамабілем БМВ X3, які рухаўся ў сустрэчным кірунку, пад кіраваннем 62-гадовага мінчука”.

Кіроўца БМВ 518i і яго два пасажыры — 25-гадовая жанчына і трохгадовае дзіця — пасля ДТЗ былі шпіталізаваныя, аднак пазней жанчына памерла ў бальніцы.

Пра смерць дзіцяці тады не паведамлялася. Звярталася ўвага, што яно ў момант сутыкнення аўтамабіляў знаходзілася ў “дзіцячай утрымлівальнай прыладзе”.