Загарода на беларуска-польскай мяжы негатыўна ўплывае на экасістэму Белавежскай пушчы — прадстаўнік запаведніка

13 лістапада, Позірк. Аб негатыўным уплыве на экасістэму Белавежскай пушчы загароды на беларуска-польскай мяжы заявіў 13 лістапада на прэс-канферэнцыі старшы навуковы супрацоўнік дзяржаўнай прыродаахоўнай установы “Нацыянальны парк Белавежская пушча” Антон Кузьміцкі.

Ён назваў падзел Белавежскай пушчы плотам “эксперыментам на каштоўным аб’екце”. Сярод негатыўных фактараў, якія ўплываюць на экасістэму пушчы, Кузьміцкі згадаў праблему свабоднай міграцыі жывёл, парушэнне гідралагічнага рэжыму, фрагментаванне асяроддзя пражывання.

“Што з гэтым рабіць, я думаю, час вырашыць. <…> Я думаю, што гэта ў нейкай перспектыве таксама страціць сваю сілу — я пра загараджальныя збудаванні. Пакуль <…> рэкамендацыі па паляпшэнні камунікацыі паміж дзвюма дзяржавамі, уладальнікамі аб’ектаў Сусветнай спадчыны, невыканальныя”, — сказаў спікер.

Паводле яго слоў, Белавежская пушча цяпер кіруецца не як адзіны прыродаахоўны аб’ект, як гэта было раней, а асобна Беларуссю і Польшчай.

ЮНЕСКА дала рэкамендацыі ў 2025 годзе Польшчы і Беларусі аднавіць, наколькі гэта магчыма, трансгранічнае супрацоўніцтва, прынамсі на ўзроўні абмену тэхнічнай інфармацыяй, адзначыў намеснік начальніка аддзела міжнароднага супрацоўніцтва Міністэрства прыродных рэсурсаў і аховы навакольнага асяроддзя Яўген Корзун.

Таксама рэкамендавана аднавіць работы па падрыхтоўцы трансгранічнага плана кіравання аб’ектам Сусветнай спадчыны, сказаў ён.

Міжнародныя эксперты прызналі наяўнасць усіх негатыўных уздзеянняў пабудаванай агароджы, адзначыў чыноўнік, падкрэсліўшы, што беларускі бок неаднаразова заяўляў пра гэта яшчэ на этапе будаўніцтва плота на такіх міжнародных пляцоўках, як ЮНЕСКА, Арганізацыя Аб’яднаных Нацый і інш. Мінпрыроды таксама звярталася ў адрас “кампетэнтных органаў дзяржаўнага кіравання Польшчы”, адзначыў Корзун.

Ён выказаў заклапочанасць інфармацыяй аб тым, што ў рамках нацыянальнай праграмы Польшчы стрымлівання і абароны “Усходні шчыт” у памежнай зоне, у тым ліку ў запаведнай, плануецца будаўніцтва сістэмы фартыфікацыйных збудаванняў.

Шкода навакольнаму асяроддзю, нанесеная будаўніцтвам Польшчай плота на мяжы з Беларуссю, папярэдне ацэньваецца ў 52 млн рублёў, або 20 млн долараў, заявіў на прэс-канферэнцыі 29 сакавіка 2024 года ў Мінску начальнік упраўлення кантролю за працай прыродаахоўнага комплексу, лесагаспадарчай галіны і праблем Чарнобыля Камітэта дзяржкантролю Васіль Рудзенік.

Паводле яго слоў, яшчэ больш сур’ёзныя наступствы “магчымыя для экасістэм Белавежскай пушчы ў бліжэйшай перспектыве”. Прадугледжаныя ў польскай загародзе “брамкі не працуюць”, заявіў чыноўнік, а калючы дрот “перашкаджае міграцыі жывёл”.

Польшча ўзводзіла 206-кіламетровы плот уздоўж мяжы з Беларуссю са студзеня 2022 года па чэрвень 2023 года. Будаўніцтва фізічнага бар’ера стала рэакцыяй Варшавы на рэгулярныя з вясны 2021 года патокі нелегальных мігрантаў, якія імкнуцца трапіць у краіны ЕС з беларускай тэрыторыі.