Мытня канфіскавала ў грамадзяніна Літвы на мяжы залатыя зліткі і манеты на 260 тыс. рублёў

24 лістапада, Позірк. 15 залатых зліткаў і манет коштам каля 260 тыс. рублёў канфіскавана ў грамадзяніна Літвы ў пункце пропуску Каменны Лог (з сумежнага боку Мядзінінкай), паведамляе Дзяржаўны мытны камітэт (ДМК).

Адзначаецца, што ўказаны груз 57-гадовы мужчына схаваў ад мытнага кантролю пры перасячэнні мяжы на аўтамабілі “Нісан”.

Пры гэтым літоўскі грамадзянін перасоўваўся ў пункце пропуску па чырвоным калідоры, каб “падаць пасажырскую дэкларацыю на часовы ўвоз аўто, а таксама задэклараваць 5 юбілейных манет і 13 залатых зліткаў і манет”.

“Толькі пры даглядзе багажу грамадзяніна гродзенскія мытнікі выявілі металічны футляр, усярэдзіне якога было схавана яшчэ 7 зліткаў і 8 манет”, — гаворыцца ў паведамленні.

ДМК адзначае, што мужчына “заплаціць штраф у памеры да 30 базавых велічынь” (1.260 рублёў) у рамках адміністрацыйнага працэсу паводле ч. 2 арт. 15.1 КаАП (перамяшчэнне тавараў, якія падлягаюць мытнаму дэклараванню, праз мытную мяжу Еўразійскага эканамічнага саюза з утойваннем ад мытнага кантролю). Матэрыялы справы накіраваныя ў суд.