Літва звярнулася ў ЕС па дапамогу ў вяртанні грузавікоў з Беларусі

30 лістапада, Позірк. Кіраўнікі двух літоўскіх ведамстваў — міністр замежных спраў Кястуціс Будрыс і міністр транспарту і сувязі Юрас Тамінскас — звярнуліся ў Еўрапейскую камісію (ЕК) з просьбай дапамагчы вярнуць грузавікі, якія захраслі ў Беларусі, паведамляе LRT са спасылкай на інфармагенцтва BNS.

Міністры таксама заклікалі Еўрасаюз увесці новыя санкцыі супраць Мінска ў сувязі з залётамі ў Літву аэрастатаў з кантрабандай.

У лісце, накіраваным у Брусель Будрысам і Тамінскасам, змяшчаецца просьба “распрацаваць і прадставіць паслядоўны план дзеянняў ЕС па аказанні дапамогі еўрапейскім перавозчыкам у Беларусі, а таксама па рашэнні праблемы бяспекі на літоўска-беларускай мяжы, звязанай з выкарыстаннем беспілотных лятальных апаратаў, у тым ліку кантрабандных паветраных шароў”.

Еўракамісарам, адказным за замежныя справы і транспарт — Каі Калас і Апосталасу Дзідзікастасу, таксама прапанавана “запатрабаваць на ўзроўні ЕС поўнага і безумоўнага вызвалення еўрапейскіх перавозчыкаў і іх актываў, якія незаконна ўтрымліваюцца на беларускім баку”.

Акрамя таго, Вільнюс просіць “аказаць садзейнічанне ў ініцыяванні прапанаваных Літвой новых санкцый супраць Беларусі, якія будуць уведзеныя ў тым ліку ў дачыненні да службовых асоб Мінска, адказных за рэйды па канфіскацыі кантрабандных паветраных шароў”.

Пасля аднаўлення працы памежных пераходаў Літва ўжо чатыры разы прыпыняла працу аэрапорта ў Вільнюсе праз новыя метэазонды, што ўрываліся ў паветраную прастору краіны з тэрыторыі Беларусі.

Напрыканцы кастрычніка Вільнюс закрыў пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, што перашкаджалі ў тым ліку грамадзянскай авіяцыі Літвы.

Пагранпераходы аднавілі працу 20 лістапада. За тры тыдні, пакуль яны былі закрытыя, рэжым Лукашэнкі паспеў пастрожыць правілы знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.

Пры гэтым Мінск настойвае, што далейшыя перамовы з Вільнюсам па гэтым пытанні маюць весціся на палітычным узроўні, Літва (прынамсі публічна) спрабуе пазбегнуць гэтага. Такія кантакты, на думку ўладаў балтыйскай дзяржавы, будуць азначаць легітымацыю беларускага рэжыму.