У Літве затрыманы мікрааўтобус, кіроўца якога спрабаваў употай завезці з Беларусі кантрабандныя цыгарэты
6 студзеня, Позірк. У пункце пропуску Шальчынінкай (з беларускага боку — Беняконі) затрыманы мікрааўтобус з кантрабанднай беларускай тытунёвай прадукцыяй, паведаміў 5 студзеня Мытны дэпартамент Міністэрства фінансаў Літвы.
Паводле інфармацыі ведамства, мікрааўтобус “Форд Транзіт” заехаў на літоўскую тэрыторыю каля 4 гадзін раніцы 24 снежня 2025 года. Кіроўца заявіў, што накіроўваецца на працу і не мае забароненых ці абмежаваных для ўвозу тавараў.
Аўтамабіль накіравалі на праверку з дапамогай рэнтгена. У столі, дне і сценах транспартнага сродку было знойдзена 41.900 пачкаў цыгарэт NZ Gold (кошт з улікам абавязковых да выплаты падаткаў — звыш 217 тыс. еўра).
Адзначаецца, што столь і дно “Форда” былі пераробленыя — патоўшчаныя прыкладна на 5 см, каб туды змясцілася як мага больш тытунёвых вырабаў. Кіроўца, як сцвярджае мытня, прызнаўся, што хаваў нелегальныя цыгарэты цягам двух дзён.
Мікрааўтобус і незаконны груз затрыманыя. Вільнюскі аддзел Службы крымінальнай мытні распачаў дасудовае расследаванне па факце кантрабанды, якое вядуць пракуроры Вільнюскай акруговай пракуратуры.
Паведамляецца, што “ў дачыненні да кіроўцы была ўжытая мера стрымання — канфіскацыя дакументаў і пісьмовае абавязацельства не пакідаць месца жыхарства”. Грамадзянства парушальніка не называецца.
