У РНПЦ дзіцячай анкалогіі 28 красавіка пройдзе дзень донара

14 красавіка, Позірк. У Рэспубліканскім навукова-практычным цэнтры дзіцячай анкалогіі, гематалогіі і імуналогіі ў Бараўлянах (Мінскі раён) 28 красавіка пройдзе дзень донара.

Цэнтр падкрэслівае, што кожны дзень мноства людзей, у тым ліку дзяцей з анкалагічнымі захворваннямі, мае патрэбу ў донарскай крыві для правядзення жыццёва важных працэдур і лячэння. Без гэтай дапамогі “шанцы на выздараўленне значна зніжаюцца”.

Усіх ахвотных РНПЦ запрашае здаць кроў, папярэдне запісаўшыся ў аддзяленні трансфузіялогіі па тэлефоне +375-17-287-10-85. Кроў можна здаць як за ўзнагароджанне (189 рублёў), так і бязвыплатна.

Як паведамляў цэнтр, у папярэдняй акцыі 28 студзеня ўзялі ўдзел 37 чалавек, з якіх 8 — на бязвыплатнай аснове. Гэта персанал, маладыя спецыялісты, валанцёры, бацькі пацыентаў.

РНПЦ дзіцячай анкалогіі — вядучая ўстанова аховы здароўя Беларусі, у якой лечаць дзіцячы рак.

Захворванне на рак у краіне складае каля 17 выпадкаў на 100 тыс.дзіцячага насельніцтва, паведаміла на прэс-канферэнцыі 11 лютага намеснік дырэктара РНПЦ, галоўны пазаштатны дзіцячы анкагематолаг Міністэрства аховы здароўя Іна Праляскоўская.

Яна прадэманстравала графік, з якога вынікала, што ў канцы 1990-х гадоў паказчыкі анкалагічнай захваральнасці дзяцей знаходзіліся ў межах 16-17 выпадкаў на 100 тыс., у сярэдзіне 2000-х адзначалася некаторае зніжэнне — да 14-15 выпадкаў, аднак пасля 2010 года прасочваецца ўстойлівы рост. Максімальныя значэнні фіксаваліся ў 2015-2021 гадах, дасягаючы амаль 20 выпадкаў.

Штогод захворвае на рак каля 300 дзяцей. У 2014 годзе такі дыягназ быў устаноўлены ў 297 дзяцей, у 2023-м — у 301, у 2024-м — у 329.

24% выпадкаў раку ў дзяцей у 2024 годзе (115 выпадкаў) было выяўлена на 4-й стадыі захворвання (у 2021-м — 50%).