Мінфін плануе размясціць дзяржаблігацыі на 70 млн долараў

20 студзеня, Позірк. Міністэрства фінансаў абвясціла пра размяшчэнне з 28 студзеня ў аддзяленнях “Беларусбанка” і “Белаграпрамбанка” дзяржаўных аблігацый 9-га і 10-га выпускаў.

Аб’ём кожнага выпуску складзе 35 млн долараў. Намінальны кошт адной аблігацыі 9-га выпуску — 1 тыс. долараў, 10-га — 5 тыс. долараў. Стаўка працэнтнага даходу — 2,7% гадавых. Тэрмін абарачэння аблігацый — 2 гады.

Дата пачатку пагашэння аблігацый — 28 студзеня 2028 года.

Датэрміновы выкуп аблігацый не прадугледжаны. Каштоўныя паперы могуць набыць фізічныя асобы — як грамадзяне Беларусі, так і замежнікі.

“Выплата працэнтнага даходу па аблігацыях і іх пагашэнне ажыццяўляюцца пры прад’яўленні аблігацыі ўладальнікам у любое аддзяленне банка, які ажыццявіў продаж аблігацыі”, — адзначылі ў ведамстве.

Умовы эмісіі, выплаты працэнтнага даходу і пагашэння 9-га і 10-га выпускаў аблігацый былі зацверджаны загадамі Мінфіна.