Восем краін па-за ЕС падтрымала яго новы крытэрый санкцый да Мінска

21 студзеня, Позірк. Албанія, Боснія і Герцагавіна, Ісландыя, Ліхтэнштэйн, Чарнагорыя, Нарвегія, Паўночная Македонія і Украіна далучыліся да рашэння Савета Еўрапейскага саюза ад 15 снежня 2025 года 2025/2585 аб абмежавальных захадах у сувязі з сітуацыяй у Беларусі і ўдзелам Беларусі ў расійскай агрэсіі супраць Украіны, паведаміў Савет ЕС 20 студзеня.

Як адзначаецца ў рэлізе, “Еўрапейскі саюз прымае да ўвагі гэтае абавязацельства і вітае яго”.

Савет ЕС увёў новы крытэрый для ўключэння ў санкцыйныя спісы “фізічных асоб, арганізацый і органаў, якія атрымліваюць выгаду ад дзеянняў або палітыкі, якая мае дачыненне да Рэспублікі Беларусь, удзельнічаюць у іх або садзейнічаюць ім, калі такія дзеянні падрываюць або пагражаюць дэмакратыі, вяршэнству права, стабільнасці або бяспекі ў ЕС і яго дзяржавах-членах”.

Як паведамлялася, рашэнне ад 15 снежня “рушыла ўслед за нядаўнімі выпадкамі ўварвання метэаралагічных шароў у паветраную прастору Літвы”.

Тлумачылася, што гэта дазволіць ЕС уводзіць абмежавальныя меры “ў дачыненні да асоб, якія плануюць, накіроўваюць, падтрымліваюць або іншым чынам садзейнічаюць замежным маніпуляцыям інфармацыяй і ўмяшанню”. Акрамя таго, ЕС зможа ўводзіць санкцыі супраць фізічных і юрыдычных асоб, якія маюць дачыненне “да дзеянняў, накіраваных супраць функцыянавання дэмакратычных інстытутаў, эканамічнай дзейнасці або паслуг, якія ўяўляюць грамадскую цікавасць, у ЕС і яго дзяржавах-членах”.

“ЕС таксама зможа прымаць меры адносна несанкцыянаванага ўезду на тэрыторыю дзяржавы-члена, — гаварылася ў рэлізе Савета ЕС, — Новы крытэрый ахоплівае таксама дзеянні, накіраваныя на ўмяшанне ў работу, пашкоджанне або знішчэнне крытычна важнай інфраструктуры, а таксама маштабныя або сістэматычныя дзеянні, якія прыводзяць да парушэння функцыянавання такой інфраструктуры”.

Указаныя восем краін рэгулярна прымаюць рашэнні аб падтрымцы санкцыйнай палітыкі ў дачыненні да Беларусі.