27 студзеня, Позірк. Чарговую партыю мясамалочнай прадукцыі забараніла ўвозіць з Беларусі ў Пскоўскую вобласць Расіі Федэральная служба па ветэрынарным і фітасанітарным наглядзе (Рассельгаснагляд).
Гэтым разам, паводле інфармацыі прэс-службы ведамства, пры ветэрынарным кантролі 200 кг сыру і гатовай мясной прадукцыі “ўстаноўлена адсутнасць ветэрынарных суправаджальных дакументаў на гатовую мясную і малочную прадукцыю, якія пацвярджаюць яе бяспеку і паходжанне“.
Паведамляецца, што перамяшчэнне 200 кг сыру і гатовай мясной прадукцыі па мытнай тэрыторыі Еўразійскага эканамічнага саюза забаронена, аформлены акт аб вяртанні грузу, тавар вернуты ў Беларусь.
20 студзеня таксама з Пскоўскай вобласці было вернута ў Беларусь 400 кг гатовай мясной і малочнай прадукцыі (вараны каўбасны выраб са свіных субпрадуктаў і паўцвёрды сыр). Тады таксама адсутнічалі неабходныя суправаджальныя дакументы, зафіксавана “парушэнне тэмпературнага рэжыму прадукцыі”, у тым ліку адсутнасць халадзільнага абсталявання.
Раней паведамлялася, што за 2025 год Паўночна-Заходняе міжрэгіянальнае ўпраўленне Рассельгаснагляду (адказвае за Санкт-Пецярбург, Ленінградскую, Наўгародскую, Пскоўскую і Валагодскую вобласці) зафіксавала 36 выпадкаў з аналагічнымі парушэннямі пры ўвозе прадукцыі жывёльнага паходжання, усе тавары агульнай масай больш за 50 тон былі вернутыя ў Беларусь.
У Бранскай вобласці за 2025 год прадухілены нелегальны ўвоз з тэрыторыі Беларусі амаль 30 тон мясамалочнай прадукцыі, звестак па памежнай з Беларуссю Смаленскай вобласці ведамства не апублікавала.
Аўтарызавацца
Забыліся пароль?
Выхад з профілю
