На біржавых таргах ізноў патаннелі долар і юань
29 студзеня, Позірк. Амерыканская і кітайская валюты патаннелі на таргах Беларускай валютна-фондавай біржы 29 студзеня 2026 года — як і на папярэдняй сесіі.
Курс долара знізіўся да 2,8496 рубля (-0,04%; -0,0012), юаня — да 4,0985 за 10 (-0,08%; -0,0031).
Еўра падаражэў да 3,4067 рубля (+0,05%; +0,0017), расійскі рубель — да 3,7465 за 100 (+0,14%; +0,0053).
На мінулым працоўным тыдні (19–23 студзеня) каціроўка долара знізілася на 1,93% (з 2,9001 да 2,844), юаня — на 1,81% (з 4,1516 да 4,0764 за 10); расійскага рубля — вырасла на 0,63% (з 3,7176 да 3,7411 за 100).
Праведзены “Позіркам” параўнальны аналіз каціровак цэнтрабанкаў на 31 снежня 2024 года і 31 снежня 2025-га паказаў, што афіцыйны курс долара ЗША ў Беларусі ў 2025 годзе знізіўся на 16,43% (з 3,4735 да 2,9027 рубля). Гэта другое месца на тэрыторыі былога СССР.
У 2024 годзе Беларусь была чацвёртай паводле росту афіцыйнага курсу амерыканскай валюты (+9,32%), у 2023-м — другой (+16,12%), у 2022-м — трэцяй (+7,39%), у 2021-м — чацвёртай сярод краін на тэрыторыі былога СССР, дзе долар патаннеў (-1,19%), у 2020-м — першай паводле яго падаражэння (+22,59%).
