Еўракамісія зарэгістравала ініцыятыву пра спыненне залежнасці ад імпарту з РФ і Беларусі
2 лютага, Позірк. Еўрапейская камісія напрыканцы студзеня зарэгістравала грамадзянскую ініцыятыву “Спыніць фінансаванне вайны Расіі: паэтапна адмовіцца ад шкоднага і бескарыснага імпарту з Расіі ў ЕС”.
На сайце Еўракамісіі паведамляецца, што аўтары ініцыятывы заклікаюць найвышэйшы орган выканаўчай улады Еўрасаюза “прапанаваць жорсткія і неадкладныя захады для спынення астатняй залежнасці ЕС ад імпарту з Расіі і Беларусі шляхам увядзення галіновых забарон або рашучай паэтапнай адмовы”.
Мэта заключаецца ў тым, каб “спыніць плынь сродкаў ЕС у расійскую дзяржаву, ліквідаваць структурныя ўразлівасці ў крытычна важных ланцужках паставак і ўмацаваць паслядоўную гандлёвую палітыку, заснаваную на каштоўнасцях”.
Адзначыўшы, што гэтая ініцыятыва “адпавядае фармальным умовам, вызначаным адпаведным заканадаўствам”, Еўракамісія палічыла яе “юрыдычна дапушчальнай у адпаведнасці з рэгламентам аб Еўрапейскай грамадзянскай ініцыятыве”.
Удакладняецца, што на гэтым этапе Еўракамісія не аналізавала змест прапаноў, а рэгістрацыя не ўплывае на канчатковае рашэнне па сутнасці ініцыятывы або на любыя магчымыя дзеянні, якія яна можа распачаць.
Пры гэтым Еўракамісія “прыме рашэнне па ініцыятыве толькі ў тым выпадку, калі будзе сабрана не менш за адзін мільён подпісаў грамадзян ЕС”. Аўтары ініцыятывы могуць распачаць збор подпісаў да 29 ліпеня, непасрэдна на збор будзе адведзены адзін год.
Калі на працягу гэтага тэрміну будзе сабраны 1 млн подпісаў і пры гэтым “дасягнутыя мінімальныя парогавыя значэнні як мінімум у сямі дзяржавах-членах”, Еўракамісія “абавязаная адрэагаваць і вырашыць, якія дзеянні, калі такія будуць, яна распачне ў адказ на ініцыятыву, абгрунтаваўшы сваё рашэнне”, гаворыцца на сайце гэтага органа.
