У рамках праверкі арміі ў гатоўнасць прыведзена адна з вайсковых частак — Мінабароны

2 лютага, Позірк. У рамках “нарошчвання мерапрыемстваў комплекснай праверкі баявой гатоўнасці” Узброеных сіл прыведзена ў “гатоўнасць да выканання задач па прызначэнні” адна з вайсковых частак Заходняга аператыўнага камандавання, паведамляе Міністэрства абароны.

“У сапраўдны момант асабісты склад рыхтуе ўзбраенне, ваенную і спецыяльную тэхніку да ўжывання, ажыццяўляе атрыманне і загрузку запасаў матэрыяльных сродкаў, рыхтуецца да здзяйснення маршу ў прызначаны раён”, — гаворыцца ў паведамленні.

Аб завяршэнні першага этапу праверкі боегатоўнасці арміі, якая праводзіцца па распараджэнні Аляксандра Лукашэнкі, заявіў 1 лютага ў эфіры тэлеканала “Беларусь 1” дзяржсакратар Савета бяспекі Аляксандр Вальфовіч.

Ён адзначыў, што мерапрыемствы праходзілі “ў няпростых умовах”, маючы на ўвазе, верагодна, устойлівыя маразы.

Асабісты склад, паводле слоў чыноўніка, “з пастаўленай задачай справіўся”, паказаўшы “станоўчы вынік”.

Паводле сцвярджэння Вальфовіча, Лукашэнка штодня кантраляваў ход праверкі, “карэктаваў” і асабіста даваў указанні.

Раптоўная праверка боегатоўнасці пачалася 16 студзеня. Тады Вальфовіч заявіў, што яна праводзіцца па новай сістэме: ён асабіста — у абыход міністра абароны — уручыў камандзіру адной з мехбрыгад распараджэнне прывесці воінскую часць у баявую гатоўнасць.

26 студзеня Лукашэнка анансаваў, што праверка будзе праходзіць да вясны.

У той жа дзень міністр абароны Віктар Хрэнін аб’явіў аб пачатку яшчэ адной праверкі боегатоўнасці воінскіх часцей і падраздзяленняў — планавай.

28 студзеня Вальфовіч заявіў, што пры першай з праверак акцэнт зроблены на малыя штурмавыя групы: “На кантрольных занятках па тактычнай падрыхтоўцы мы глядзім, як ваеннаслужачыя ўмеюць дзейнічаць тройкамі, пяцёркамі” (выкарыстанне такіх груп характэрна для расійска-ўкраінскай вайны. — “Позірк”.).

Папярэдняя “раптоўная праверка” УС праводзілася ў кастрычніку 2025 года.

Рэжым Лукашэнкі практычна няспынна праводзіць вучэнні, трэніроўкі, зборы на фоне абвастрэння адносін з Захадам (акрамя ЗША пасля прыходу да ўлады прэзідэнта Дональда Трампа) і поўнамаштабнай вайны Расіі супраць Украіны.