У рамках праверкі боегатоўнасці прызваныя з запасу ваеннаслужачыя адпрацоўваюць стральбу з гранатамётаў

3 лютага, Позірк. У рамках праверкі баявой гатоўнасці Узброеных сіл на адным з палігонаў праводзяцца заняткі з ваеннаабавязанымі, прызванымі з запасу, паведамляе Міністэрства абароны.

“У палявых умовах для запаснікаў арганізаваны заняткі па асноўных прадметах баявой падрыхтоўкі. Яны выконваюць практыкаванні стрэльбаў з розных відаў стралковай зброі і гранатамётаў”, — адзначае ведамства.

За ходам заняткаў, як заяўляецца, назірае намеснік міністра абароны Аляксандр Навуменка. “Ён ацаніў узровень падрыхтоўкі асабовага складу і даў указанні па далейшым удасканаленні навучальнага працэсу”, — гаворыцца ў паведамленні.

Раней паведамлялася, што ў рамках комплекснай праверкі міністр абароны Віктар Хрэнін 3 лютага распарадзіўся прывесці ў гатоўнасць да выканання задач шэраг воінскіх частак і падраздзяленняў 6-й асобнай гвардзейскай механізаванай брыгады (дыслацыравана ў Гродне, адносіцца да Заходняга аператыўнага камандавання).

“Ваеннаслужачым трэба будзе ў кароткія тэрміны падрыхтаваць узбраенне, ваенную і спецыяльную тэхніку да выхаду ў новыя раёны, дзе з асабовым складам будуць праведзены заняткі па баявой падрыхтоўцы, — адзначала Мінабароны. — Асаблівая ўвага падчас праверкі будзе нададзена пытанням кіравання, падрыхтоўкі і здзяйснення маршаў, адпрацоўкі задач аховы і маскіроўкі, процідзеянню дыверсійна-разведвальным групам саперніка і беспілотнай авіяцыі ва ўмовах актыўнага прымянення сродкаў радыёэлектроннай барацьбы”.

Напярэдадні Мінабароны паведаміла, што ў рамках “нарошчвання мерапрыемстваў комплекснай праверкі баявой гатоўнасці” Узброеных сіл прыведзена ў “гатоўнасць да выканання задач па прызначэнні” адна з воінскіх частак Заходняга аператыўнага камандавання. Што гэта за частка, не ўдакладнялася.

Аб пачатку “планавай” комплекснай праверкі боегатоўнасці воінскіх часцей і падраздзяленняў Хрэнін абвясціў 26 студзеня. Яна была абвешчана паралельна з раптоўнай праверкай боегатоўнасці арміі, якая пачалася 16 студзеня па даручэнні Аляксандра Лукашэнкі — у абыход Мінабароны.

Улады ў Мінску практычна няспынна праводзіць вучэнні, трэніроўкі, зборы на фоне абвастрэння адносін з Захадам (акрамя ЗША пасля прыходу да ўлады прэзідэнта Дональда Трампа) і поўнамаштабнай вайны Расіі супраць Украіны.