Мытня знайшла паўсотні боепрыпасаў ва ўвезеным з Літвы красоверы
19 лютага, Позірк. Паўсотні боепрыпасаў знайшла Мінская рэгіянальная мытня ў адным з аўтамабіляў, які быў увезены ў Беларусь з Літвы на аўтавозе, паведаміла 19 лютага прэс-служба Дзяржаўнага мытнага камітэта.
Паводле інфармацыі ведамства, прывезеныя транспартныя сродкі праходзілі мытныя аперацыі ў пункце афармлення “Калядзічы-аўта”. Супрацоўнікі кіналагічнага аддзела выявілі ў адным з іх — красоверы Buick Encore — схаваны пакет з 54 патронамі.
“Знешні выгляд схаванага ў тэхналагічнай паражніне багажніка тавару сведчыў пра яго прыналежнасць для стральбы з гладкаствольнай зброі, — гаворыцца ў паведамленні. — У Дзяржаўным камітэце судовых экспертыз, куды патроны накіравалі на экспертызу, пацвердзілі прыдатнасць боепрыпасаў для стральбы”.
Распачатая крымінальная справа паводле ч. 1 арт. 3331 КК (незаконнае перамяшчэнне праз мытную мяжу ЕАЭС або мяжу Беларусі моцнадзейных, атрутных рэчываў, радыеактыўных матэрыялаў, агнястрэльнай зброі, боепрыпасаў, выбуховых рэчываў, выбухных прыстасаванняў, зброі масавага паражэння або сродкаў яго дастаўкі, а таксама іншых відаў узбраення і вайсковай тэхнікі).
4 снежня 2025 года паведамлялася, што пры праверцы ў пункце пропуску Каменны Лог аўтамабіля, што накіроўваўся з Літвы ў Беларусь, мытнікі знайшлі фіксатар з чатырма патронамі. За рулём аўтамабіля быў грамадзянін Германіі.
Згодна з данымі мытнага камітэта, якія прыводзяць дзяржСМІ, у 2025 годзе зафіксавана 14 фактаў увозу зброі, боепрыпасаў, выбуховых рэчываў. Распачата дзевяць крымінальных спраў.
З незаконнага абароту вынята каля 4,2 тыс. боепрыпасаў, 6 адзінак агнястрэльнай, 6 адзінак пнеўматычнай, сігнальнай зброі, больш за 150 складных частак зброі і боепрыпасаў.
Выяўлена партыя выбуховых рэчываў вагой больш за 580 кг.
У 2024 годзе мытныя органы Беларусі канфіскавалі шэсць адзінак зброі, 363 адзінкі боепрыпасаў і 797 адзінак складных частак боепрыпасаў да агнястрэльнай зброі, паведамляла прэс-служба Генеральнай пракуратуры.
Па “выкрытых незаконных дзеяннях адносна зброі і боепрыпасаў” распачата 16 крымінальных спраў.
