МУС адсправаздачылася аб выяўленні схемы незаконнай міграцыі пад выглядам стварэння фіктыўнай швейнай вытворчасці

24 лютага, Позірк. Аб выяўленні “схемы незаконнай міграцыі” паведаміла 24 лютага прэс-служба МУС.

Паводле яе інфармацыі, 30-гадовы выхадзец з Цэнтральнай Азіі, які пражывае ў Гомелі, з’яўляючыся ўладальнікам фірмы-пасажыраперавозчыка, “пашырыў сферу дзейнасці нібыта для пашыву адзення“ і “з мэтай прыцягнення швачак на фіктыўную вытворчасць афармляў загадзя падробленыя дакументы для замежнікаў і падаваў іх у дзяржустановы“.

Паведамляецца, што “такім чынам фігурант забяспечыў выдачу ўязных віз 20 мігрантам”, пры гэтым з кожнага браў па 300 долараў. Мігранты “прыбылі ў Беларусь і пражывалі ў арандаваных кватэрах, не працавалі, маючы намер трапіць у краіны Еўрасаюза“.

“Арганізатар затрыманы пры сілавой падтрымцы байцоў АМАПа. Следчымі ўзбуджаная крымінальная справа. Яго кліенты прыцягнуты да адміністрацыйнай адказнасці. Большасць з іх самастойна пакінулі нашу краіну або былі дэпартаваныя. Некалькі чалавек застаюцца ў ізалятары часовага ўтрымання“, — адзначае МУС.

Ведамства праводзіць мерапрыемствы па “ўстанаўденні ўсіх датычных да злачыннай дзейнасці”.

З вясны 2021 года на мяжы Беларусі і краін ЕС працягваецца міграцыйны крызіс. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта “паклікалі“.