Праца аэрапорта ў Вільнюсе зноў прыпынялася з-за кантрабандных шароў

27 сакавіка, Позірк. Праца аэрапорта ў Вільнюсе прыпынялася праз кантрабандныя шары з Беларусі 26 і 27 сакавіка, паведамляе LRT са спасылкай на агенцтва ELTA і BNS.

Паветраная прастора над аб’ектам была абмежаваная з 21:56 да 22:55 напярэдадні “праз выяўленыя навігацыйныя знакі, характэрныя для кантрабандных паветраных шароў“.

На сайце аэрапорта Вільнюса адзначалася, што абмежаванні закранулі адзін рэйс — самалёт AirBaltic з Мюнхена ў сталіцу Літвы быў перанакіраваны ў Каўнас.

Вылеты бартоў былі дазволеныя.

Праца аэрапорта была прыпыненая ў другі раз праз 24 хвіліны пасля паўночы 27 сакавіка і аднавілася ў 00:50. Адзін рэйс са 182 пасажырамі быў перанакіраваны ў Каўнас, усе пасажыры дастаўленыя ў Вільнюс аўтобусамі.

Сёлета гэта ўжо пяты і шосты выпадкі, калі праца аэрапорта парушаецца з-за паветраных шароў.

Уварванне шароў з кантрабанднымі цыгарэтамі з Беларусі ў Літву восенню і на пачатку снежня 2025 года стала прычынай неаднаразовага закрыцця Вільнюскага аэрапорта, размешчанага недалёка ад мяжы.

Папярэдні раз аэрапорт прыпыняў працу з-за прылёту з боку Беларусі метэазондаў з кантрабандай 22 сакавіка, да гэтага — 14 сакавіка.

20 сакавіка Аляксандр Лукашэнка ў чарговы раз усумніўся ў тым, што метэазонды могуць паралізаваць працу аэрапортаў: “Узляцеў самалёт, чыста ўзляцеў. Відаць жа, што шарыкаў няма на ўзлётнай паласе. Узляцеў, і ён высока — 10-11 км, а там шарыкі не лятаюць“.

Неназваныя пілоты, паводле яго сцвярджэння, “пацвердзілі, што гэтыя шары не ўяўляюць сур’ёзнай праблемы”.

Летась 9 снежня ўрад Літвы абвясціў экстрэмальную сітуацыю дзяржаўнага ўзроўню праз “гібрыдную атаку Беларусі”. Пастанова была прынятая “ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, стваранага тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.

У спробе прымусіць Мінск паўплываць на сітуацыю Літва з 29 кастрычніка па 19 лістапада закрывала мяжу з Беларуссю.

Памежныя пераходы аднавілі працу 20 лістапада. За тры тыдні, пакуль яны былі зачыненыя, рэжым Лукашэнкі паспеў зрабіць больш жорсткімі правілы знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі затрымалася ад 1,3 да 1,9 тыс. зарэгістраваных у Літве грузавікоў, працэс вывазу якіх пачаўся толькі сёлета 23 сакавіка.