Лукашэнка і Пуцін абмеркавалі “супрацоўніцтва ў тройцы Беларусь — Расія — КНДР”

12 красавіка, Позірк. “Супрацоўніцтва ў тройцы Беларусь — Расія — КНДР” абмеркавалі па тэлефоне 12 красавіка Аляксандр Лукашэнка і прэзідэнт Расіі Уладзімір Пуцін.

Як паведамляе неафіцыйны тэлеграм-канал прэс-службы Лукашэнкі, “пул перспектыўных напрамкаў супрацоўніцтва” вызначаны па выніках афіцыйнага візіту беларускага палітыка ў Паўночную Карэю.

“У сённяшняй размове абмяркоўвалася магчымасць рэалізацыі шэрагу праектаў у трохбаковым фармаце”, — гаворыцца ў паведамленні.

Таксама адзначаецца, што “асаблівую ўвагу” Лукашэнка і Пуцін надалі падрыхтоўцы чарговага Форуму рэгіёнаў Беларусі і Расіі, які пройдзе ў чэрвені 2026 года ў Мінску і Мінскай вобласці і будзе прысвечаны “тэматыцы эканамічнага ўзаемадзеяння”.

Пра тэлефонную размову палітыкаў раней паведаміла прэс-служба Крамля.

Стала вядома, што Лукашэнка плануе наведаць Маскву з нагоды Дня Перамогі 9 траўня.

Візіт Лукашэнкі ў КНДР праходзіў 25–26 сакавіка.

26 сакавіка па выніках перамоў са старшынёй Дзяржаўных спраў КНДР Кім Чэн Ынам падпісаны дагавор аб дружбе і супрацоўніцтве паміж Беларуссю і Паўночнай Карэяй.

На перамовах з Пуціным 15 верасня 2023 года ў Сочы Лукашэнка выказаў меркаванне, што РФ, Беларусь і КНДР маглі б “падумаць аб супрацоўніцтве дзесьці на траіх”.

“Паўночная Карэя, Расія, <…> я думаю, кавалак працы і Беларусі там знойдзецца з улікам тых праблем, якія існуюць”, — сказаў палітык.