У Літве перахопленыя яшчэ два дроны з беларускімі цыгарэтамі

4 траўня, Позірк. Аб перахопе “на працягу некалькіх гадзін” двух дронаў з кантрабанднымі беларускімі цыгарэтамі паведаміла 4 траўня Служба аховы дзяржаўнай мяжы Літвы (САДМ).

Адзін беспілотнік быў заўважаны памежнікамі ўвечары 1 траўня ў Шальчынінскім раёне. У выніку прымянення “службовага антыдронавага абсталявання” БПЛА быў збіты і пасля знойдзены каля вёскі Ута. Дрон пераносіў 200 пачкаў цыгарэт “NZ Gold” з беларускімі акцызнымі маркамі.

Другі беспілотнік сістэма відэаназірання зафіксавала ў раёне вёскі Прудзяляй Шальчынінкскага раёна. Ён таксама быў збіты, пераносіў у двух завадскіх скрынках 1.000 пачкаў цыгарэт “NZ Gold”.

САДМ паведамляе, што агульны кошт 1.200 пачкаў цыгарэт складае 6.612 еўра.

Па факце набыцця і перавозкі падакцызных тавараў з парушэннем устаноўленага парадку распачатыя адміністрацыйныя вытворчасці. БПЛА і цыгарэты “часова захоўваюцца як безгаспадарная маёмасць“, паведамляе ведамства.

Паводле звестак САДМ, сёлета ў Літве перахоплена 15 дронаў з кантрабанднымі беларускімі цыгарэтамі. За ўвесь 2025 год літоўскія памежнікі перахапілі 59 такіх беспілотнікаў, у 2024 годзе — 54.