Пасля перамогі апазіцыі ў Венгрыі Лукашэнка выступіў за працяг супрацы Мінска і Будапешта

13 красавіка, Позірк. Аляксандр Лукашэнка 13 красавіка павіншаваў старшыню апазіцыйнай партыі “Ціса” Петэра Мадзьяра з перамогай на парламенцкіх выбарах у Венгрыі.

Палітык, як паведамляе яго прэс-служба, выказаў спадзеў на тое, што “моцны голас Венгрыі на міжнароднай арэне будзе і надалей гучаць у духу прагматызму, скіраванасці на падтрыманне ўсеагульнай бяспекі, павагі да ўсіх народаў”.

“Перакананы, традыцыі сяброўства і ўзаемавыгаднай супрацы, якія склаліся за многія гады паміж Мінскам і Будапештам, маюць працягвацца”, — падкрэсліў Лукашэнка.

Беларускі дэмакратычны лідар Святлана Ціханоўская павіншавала Мадзьяра напярэдадні ўвечары. “З нецярпеннем чакаю сумеснай працы па ўмацаванні свабоднай, мірнай і аб’яднанай Еўропы, пабудаванай на дэмакратыі, вяршэнстве права і волі народа”, — адзначыла яна.

Перамога партыі “Ціса” на выбарах у Дзяржаўны сход Венгрыі, што прайшлі 12 красавіка, завяршае 16-гадовае праўленне партыі “Фідэс” прэм’ер-міністра Віктара Орбана, які праводзіў, асабліва ў апошнія гады, антыеўрапейскую, антыўкраінскую, прарасійскую палітыку.

Яўка выбаршчыкаў выявілася рэкорднай — амаль 80%. Пасля апрацоўкі 99% бюлетэняў апазіцыя атрымае мінімум 138 мандатаў са 199, што азначае, што ў парламенце яна будзе мець канстытуцыйную большасць.

На ўчастку для галасавання ў венгерскай амбасадзе ў Мінску яўка была 100-працэнтнай: у выбарах узялі ўдзел усе 17 выбаршчыкаў, якія зарэгістраваліся, вынікае з інфармацыі Нацыянальнай выбарчай камісіі Венгрыі.

Парламент краіны абіраецца паводле змяшанай сістэмы: 93 з 199 дэпутатаў — праз партыйныя спісы, 106 — праз аднамандатныя акругі.

Напярэдадні выбараў былі апублікаваныя запісы тэлефонных перамоваў, як сцвярджаецца, Орбана з прэзідэнтам Расіі Уладзімірам Пуціным, а таксама міністра замежных спраў Венгрыі Петэра Сіярты з расійскім калегам Сяргеем Лаўровым. Са зместу гутарак вынікала, што Будапешт гатовы аказаць Маскве любое садзейнічанне ў папулярызацыі яе інтарэсаў.

Венгрыя як член Еўрасаюза фармальна падтрымлівае санкцыі ЕС супраць беларускіх уладаў, аднак прадстаўленая ў Беларусі на ўзроўні амбасадара (найвышэйшы ўзровень дыпламатычнага прадстаўніцтва) — нараўне з членам ЕС Славакіяй, дзе прэм’ер-міністрам з’яўляецца прарасійскага ладу Роберт Фіца.

Орбан сустракаўся з Лукашэнкам у Мінску ў чэрвені 2020 года, у разгар эпідэміі каранавіруса, за два месяцы да прэзідэнцкіх выбараў у Беларусі.

Сіярта наведваў Мінск не менш за чатыры разы (у лістападзе 2023 года, траўні і кастрычніку 2024-га, верасні 2025-га). Падчас апошняга візіту ён заявіў у інтэрв’ю тэлеканалу “Беларусь 1”, што санкцыі ЕС “нашкодзілі больш Еўропе і еўрапейскай эканоміцы, чым Беларусі ці Расіі”.