У студзені — лютым Расія павялічыла на 20% экспарт сельгаспрадукцыі ў Беларусь

27 красавіка, Позірк. У студзені — лютым 2026 года Расія павялічыла на 20% (у грашовым выражэнні) экспарт сельскагаспадарчай прадукцыі ў Беларусь у параўнанні з аналагічным леташнім перыядам, паведамляе прэс-служба Федэральнага цэнтра развіцця экспарту прадукцыі аграпрамысловага комплексу РФ (Аграэкспарт).

Паводле інфармацыі ведамства, з РФ у Беларусь было пастаўлена больш за 575 тыс. тон прадукцыі АПК на суму каля 670 млн долараў.

У вартасным выражэнні больш за ўсё накіравана сланечнікавага алею (98 млн долараў; +16%), кармоў для котак і сабак (37 млн; +75%), насення рапсу (33 млн; -8%), соевых бабоў (28 млн; рост у 3,6 раза), распушчальнай кавы (18 млн; +90%).

Раней “Позірк” паведамляў, што ў студзені — лютым 2026 года вытворчасць сельгаспрадукцыі ў Еўразійскім эканамічным саюзе павялічылася на 1,3%. Рост назіраўся ва ўсіх дзяржавах ЕАЭС (без уліку даных па Арменіі).

У Казахстане сельгасвытворчасць за гэты перыяд павялічылася на 3,4%, Беларусі — на 2,8%, Кыргызстане — на 2,6%, Расіі — на 0,7% (інфармацыя па Арменіі перадаецца адзін раз на квартал).

Аб’ём знешняга гандлю харчовымі таварамі і сельскагаспадарчай сыравінай у студзені — лютым 2026 года склаў 2 млрд 833,3 млн долараў — на 23,3% больш, чым было за аналагічны перыяд 2025-га (2 млрд 298,8 млн).

Экспарт харчовых тавараў і сельскагаспадарчай сыравіны склаў 1 млрд 739,7 млн долараў (1 млрд 415 млн; +22,9%). Іх доля ў агульным аб’ёме экспарту склала 26% (24,6%; +1,4 працэнтнага пункта).

Імпарт дасягнуў 1 млрд 93,6 млн долараў (883,8 млн; +23,7%). Яго доля — 14,4% (13%; +1,4 п.п.).

Дадатнае сальда склалася ў памеры 646,1 млн долараў (531,2 млн; +21,6%).