Прэзідэнт Польшчы Наўроцкі вітаў вызваленне Пачобута з “цяжкай турмы рэжыму Лукашэнкі”

28 красавіка, Позірк. “Анджэй Пачобут, палітычны зняволены рэжыму Лукашэнкі, кавалер Ордэна Белага Арла, на свабодзе!” — напісаў на сваёй старонцы ў сацсетцы Х прэзідэнт Польшчы Караль Наўроцкі, каментуючы вызваленне журналіста, якое адбылося 28 красавіка, і яго наступны вываз на польскую тэрыторыю.

“Дзякую прэзідэнту Злучаных Штатаў Дональду Трампу за садзейнічанне ў вызваленні нашага суайчынніка. Дзякую ўсім, хто працаваў дзеля гэтага поспеху”, — адзначыў Наўроцкі.

Як паведамляюць польскія СМІ, Наўроцкі таксама заявіў, што Пачобут — гэта “чалавек, які даказаў, наколькі моцная польская ідэнтычнасць, прыхільнасць польскім каштоўнасцям, і які заплаціў за гэта вельмі высокую цану ў цяжкай турме рэжыму Лукашэнкі”.

Пра вызваленне і вываз з Беларусі ў Польшчу журналіста, актывіста польскай меншасці Анджэя Пачобута стала вядома 28 красавіка. Ён быў у ліку асуджаных, якіх Польшча і іншыя дэмакратычныя краіны вызвалілі ў рамках абмену з Беларуссю і РФ па схеме “пяць на пяць”. На польскай тэрыторыі журналіста сустрэў прэм’ер-міністр краіны Дональд Туск.