28 красавіка, Позірк. У рамках абмену, які адбыўся 28 красавіка, паводле схемы “пяць на пяць“ Польшчы перададзены яе грамадзянін, палітвязень Томаш Бяроза, Беларусі — былы ўдзельнік “Паспалітага рушэння“ Уладзіслаў Надзейка, паведамляюць дзяржСМІ.
Такім чынам, вядомыя імёны трох з пяці чалавек, якіх Польшча і іншыя дэмакратычныя краіны вызвалілі ў рамках згаданага абмену з Беларуссю і Расіяй.
Апроч Бярозы, гэта журналіст, актывіст польскай меншасці Анджэй Пачобут, грамадзянін Польшчы манах-кармеліт Гжэгаж Гавел. Двое іншых з’яўляюцца грамадзянамі Малдовы, бо раней прэзідэнт Малдовы Мая Санду паведаміла аб вызваленні ў рамках згаданай схемы двух суайчыннікаў. Пра тое ж заявіла ФСБ РФ.
Вядомыя чатыры прозвішчы вернутых з польскай тэрыторыі. Акрамя Надзейкі, гэта былы намеснік старшыні Службы інфармацыі і бяспекі Малдовы Аляксандр Балан, які працаваў на беларускі КДБ, і двое грамадзян Расіі — археолаг Аляксандр Буцягін і жонка расійскага вайскоўца, які служыць у Прыднястроўі (сепаратысцкі рэгіён Малдовы), Ніна Папова.
8 ліпеня 2024 года Брэсцкі абласны суд прыгаварыў грамадзяніна Польшчы, палітвязня Томаша Бярозу да 14 гадоў пазбаўлення волі ва ўмовах узмоцненага рэжыму. Паводле звестак праваабарончага цэнтра “Вясна“, мужчына быў прызнаны вінаватым паводле ч. 1 арт. 3581 (агентурная дзейнасць) і арт. 358 (шпіянаж) Крымінальнага кодэкса.
Справу ў закрытым рэжыме разглядаў суддзя Сяргей Беразюк.
Праваабаронцы звярталі ўвагу, што прысуд быў вынесены 14 чэрвеня 2023 года, але вядома пра гэта стала толькі ў ліпені 2024-га.
Бяроза адбываў тэрмін у папраўчай калоніі № 22 у Івацэвічах (Брэсцкая вобласць).
Пра затрыманне беларускага грамадзяніна Уладзіслава Н. і ўзяцце яго пад варту на тры месяцы 10 верасня 2025 года паведаміла Агенцтва ўнутранай бяспекі Польшчы (АУБ). Адзначалася, што ён ажыццяўляў разведвальную дзейнасць на тэрыторыі Польшчы і Венгрыі, а затрыманне беларуса стала вынікам “працяглай аперацыі, праведзенай АУБ сумесна з чэшскімі, венгерскімі, румынскімі і малдаўскімі спецслужбамі“.
23 верасня 2025 года паведамлялася, што ва Уладзіслава Н. знойдзены спіс суайчыннікаў, якія атрымалі ў Польшчы прытулак. Адзначалася, што на замову КДБ Беларусі мужчына вёў сачэнне за фігурантамі спісу, збіраў на іх інфармацыю і перадаваў яе ў Мінск.
Паводле даных партала reform.news, затрыманы — 33-гадовы Уладзіслаў Надзейка, які раней знаходзіўся ў беластоцкай харугве “Паспалітага рушэння“.
