19 ліпеня, Позірк. Аб смяротным дарожна-транспартным здарэнні ў Сенненскім раёне (Віцебская вобласць) паведаміла Міністэрства па надзвычайных сітуацыях.
ДТЗ здарылася на аўтамабільнай дарозе Р-25 каля вёскі Хотцы.
“Па прыбыцці падраздзяленняў МНС было ўстаноўлена, што ў выніку сутыкнення з дрэвам здарылася перакульванне легкавога аўтамабіля, у салоне якога апынуліся заблакаваныя кіроўца і жанчына-пасажыр”, — гаворыцца ў паведамленні.
Пры дапамозе гідраўлічнага аварыйна-выратавальнага інструмента супрацоўнікі МНС “дэблакавалі пацярпелых і перадалі брыгадзе хуткай медыцынскай дапамогі”.
“Пазней жанчына памерла”, — адзначае ведамства.
На месцы здарэння працавалі чатыры адзінкі тэхнікі МНС.
Таксама ведамства паведаміла пра ўтапленне жанчыны ў Пастаўскім раёне (Віцебская вобласць).
“Інцыдэнт здарылася паблізу вуліцы Лясной у вёсцы Калееўцы. Цела жанчыны знайшлі і дасталі з вады работнікі ТРВОД. Прычыны і абставіны здарэння высвятляюцца”, — канстатавалі ў міністэрстве.
Паводле звестак Рэспубліканскага таварыства ратавання на водах (ТРВОД), жанчына 1979 года нараджэння адпачывала “на беразе пажарнага вадаёма, пайшла купацца, падчас купання загінулая занырнула і сышла да дна”.
Цела знойдзена ў 1,5 метрах ад берага на глыбіні двух метраў.
