Лукашэнка разлічвае на захаванне “дасягнутага ўзроўню даверу” з Нікарагуа

19 ліпеня, Позірк. “Прынцыпы роўнасці, сацыяльнай справядлівасці і права на самавызначэнне, якія забяспечваюць мірнае жыццё нікарагуанскага народа, з’яўляюцца блізкімі і зразумелымі для Беларусі, дзе чалавек і яго дабрабыт заўсёды ў цэнтры дзяржаўнай палітыкі”, — заявіў Аляксандр Лукашэнка, віншуючы 19 ліпеня ўлады Нікарагуа з 47-й гадавінай Сандзінісцкай рэвалюцыі.

Віншаванне адрасавана супрэзідэнтам Даніэлю Артэгу і яго жонцы Расарыё Мурыльё. Інстытут двоеўладдзя, які фактычны замацоўвае сямейны рэжым праўлення, дзейнічае ў Нікарагуа са студзеня 2025 года. Пры гэтым Сандзінісцкая рэвалюцыя, адным з лідараў якой быў цяпер 80-гадовы Артэга, прывяла да звяржэння рэжыму Самосы — сям’і, якая кіравала ў краіне на працягу 45 гадоў (улада дэ-факта перадавалася ад аднаго сваяка іншаму).

Паводле слоў Лукашэнкі, якія перадае яго прэс-служба, “закладзены ў апошнія гады трывалы падмурак беларуска-нікарагуанскіх адносін дасць магчымасць і надалей дынамічна развіваць узаемавыгаднае двухбаковае супрацоўніцтва ў сферах агульнай цікавасці”.

“Разлічваю на захаванне дасягнутага ўзроўню даверу, які дапамагае нам паспяхова рэалізоўваць усе сумесныя планы”, — адзначыў віншавальнік.

15 верасня 2025 года, віншуючы Артэгу і Мурыльё з Днём незалежнасці, Лукашэнка заявіў сярод іншага, што адносіны Беларусі і Нікарагуа, заснаваныя на “ўзаемнай павазе і даверы, прыхільнасці агульначалавечым каштоўнасцям і сацыяльнай справядлівасці”, характарызуюцца “дынамічным развіццём”.

“Нашы краіны працуюць над рэалізацыяй сумесных гандлёва-эканамічных праектаў, паспяхова ўзаемадзейнічаюць на міжнародных пляцоўках, разам праводзяць маштабныя культурныя мерапрыемствы, — падкрэсліў Лукашэнка. — Разлічваю на далейшае ўмацаванне дружалюбных сувязяў і паглыбленне канструктыўнага супрацоўніцтва ў сферах агульнай цікавасці на карысць абедзвюх дзяржаў”.

Ніякіх канкрэтных лічбаў, якія б пацвярджалі эканамічны поспех развіцця адносін дзвюх краін, віншавальнік тады не прывёў.

Год таму Лукашэнка, віншуючы ўлады і народ Нікарагуа з “46-й гадавінай трыумфу Сандзінісцкай рэвалюцыі”, заявіў, што “ўзаемавыгаднае партнёрства” штогод узмацняецца і “ў хуткім часе прынясе адчувальныя вынікі для абедзвюх краін”. Адметна, што пра “адчувальныя вынікі”, якія ў “хуткім часе” пачне даваць двухбаковае супрацоўніцтва, Лукашэнка адзначаў і ў аналагічным віншаванні ў адрас кіраўніцтва Нікарагуа 19 ліпеня 2024-га.

Летась у сярэдзіне красавіка Савет міністраў Беларусі зацвердзіў дадатковае пагадненне з Нікарагуа аб выдзяленні экспартных крэдытаў на пастаўкі беларускай тэхнікі.

18 ліпеня 2023 года Лукашэнка ўхваліў праект пагаднення паміж урадамі Беларусі і Нікарагуа аб узаемнай адмене візавых патрабаванняў. Дагавор набыў моц у лютым 2024 года.

Тагачасны прэм’ер-міністр Раман Галоўчанка 14 ліпеня 2023 года падпісаў праект міжурадавага пагаднення з Нікарагуа пра стварэнне сумеснай камісіі па гандлёва-эканамічнай супрацы.

15 ліпеня 2024 года Лукашэнка ўхваліў праекты міжурадавых пагадненняў Беларусі з Кубай і Нікарагуа аб “супрацы і ўзаемнай дапамозе ў мытных справах”.

Амбасада Беларусі на Кубе (па сумяшчальніцтве адказвае за стасункі з Нікарагуа) не прыводзіць ніякіх лічбаў узаемнага гандлю Мінска і Манагуа. Схематычны графік на сайце дыпмісіі дае зразумець, што аб’ём гандлю паміж дзвюма краінамі з 2017 года пераважна падаў, склаўшыся ў 2021 годзе прыкладна на ўзроўні 1,2 млн долараў (большая частка прыпадае на беларускі экспарт). Пазнейшая краінавая статыстыка знешняга гандлю Белстатам засакрэчаная.

Нікарагуа традыцыйна падтрымлівае Беларусь і Расію на міжнародным узроўні, напрыклад, не прымаючы скіраваныя супраць іх рэзалюцыі Генасамблеі ААН. Некаторыя эксперты сцвярджаюць, што ўлады краіны фактычна гандлююць сваім палітычным голасам на міжнароднай арэне.

Лукашэнка на сустрэчы з кіраўніком МЗС Нікарагуа Дэнісам Манкада Каліндрасам 19 траўня 2023 года ў Мінску адкрыта захапіўся палітычнай дзейнасцю аўтарытарнага прэзідэнта Артэгі.

Нікарагуа аднесена да катэгорыі небяспечных краін для беларусаў, якія пераследуюцца на радзіме з палітычных матываў, гаворыцца ў даследаванні арганізацыі “Прававая ініцыятыва”.