4 траўня, Позірк. 35-гадовага жыхара Брэста і 37-гадовага жыхара Маларыцкага раёна (Брэсцкая вобласць) затрымалі аператыўнікі 6-га ўпраўлення ГУБАЗіК Міністэрства ўнутраных спраў пры садзейнічанні абласной мытні, паведаміла 4 траўня прэс-служба МУС.
Паводле сцвярджэння ведамства, мужчыны “пад аператыўным кантролем” сілавікоў прывезлі з Польшчы 32 кілаграмы пораху. Рэчыва захоўвалася на складзе ў Брэсце. Пасля была зробленая спроба пераправіць яго ў Расію фурай, якая належыць брэсцкай арганізацыі. Грузавік затрымалі на трасе М1 супрацоўнікі Дзяржаўтаінспекцыі і байцы атрада спецпрызначэння “Шторм” унутраных войскаў МУС.
Экспертыза пацвердзіла, што знойдзенае рэчыва — порах.
Распачатая крымінальная справа. Заяўлена, што фігурантам пагражае да 10 гадоў пазбаўлення волі. “Праводзяцца далейшыя мерапрыемствы па высвятленні атрымальнікаў выбуховых рэчываў у суседняй краіне, іх матывы і мэты”, — гаворыцца ў паведамленні.
