40% ліміту па бяспошлінным увозе электрамабіляў на год ужо выбрана

8 траўня, Позірк. Паводле звестак Дзяржаўнага мытнага камітэта, за першыя чатыры месяцы 2026 года юрыдычныя і фізічныя асобы выкарыстоўвалі больш за 40% ільготных квот па бяспошлінным увозе электрамабіляў, паведамляюць дзяржСМІ.

Паводле слоў кіраўніка ведамства Уладзіміра Арлоўскага, агульны ліміт для Беларусі ўстаноўлены ў рамках дамоўленасцей у Еўразійскім эканамічным саюзе: “Квота ўстаноўлена ў памеры 20 тыс. аўтамабіляў [у год]”.

Само абмежаванне ўведзенае рашэннем ЕЭК у снежні мінулага года.

Пастанова беларускага ўрада ад 5 траўня № 223  размеркавала названую квоту паміж юрыдычнымі і фізічнымі асобамі, удакладніў ён: 13,8 тыс. і 6,2 тыс. адпаведна.

Першыя яшчэ могуць задэклараваць 8.091 электрамабіль, другія — 3.673.

У красавіку 2026 года прадпрыемства “Белтэхагляд” выдала на электрамабілі 2.771 дазвол на допуск транспартнага сродку да ўдзелу ў дарожным руху — у 2,1 раза больш, чым у красавіку 2025-га (1.311).

Паводле даных “БАА-Кансалт” (даччынае прадпрыемства Беларускай аўтамабільнай асацыяцыі), статыстыка красавіка пацвярджае “змену спажывецкіх пераваг на карысць экалагічнага транспарту”.

У прыватнасці, як адзначаецца, “сёння кожны трэці прададзены аўтамабіль у краіне — цалкам электрычны, а сумарная доля электрыфікаваных мадэляў (электра + гібрыды) у структуры рынку дасягнула 43%”.

Паводле тыпаў рухавікоў прададзеныя ў Беларусі ў 2025 годзе мадэлі размеркаваліся наступным чынам: ДВС — 82,17% агульнай колькасці, электрычныя — 12,48%, гібрыды — 5,35%.