Ціханоўская і Берсе абмеркавалі далейшае супрацоўніцтва пасля адкрыцця ў Вільнюсе інфапункта СЕ для беларусаў

13 траўня, Позірк. Далейшае супрацоўніцтва абмеркавалі 12 траўня ў Вільнюсе Святлана Ціханоўская і генеральны сакратар Савета Еўропы (СЕ) Ален Берсе, паведамляе прэс-служба беларускага палітыка.

Сустрэча прайшла пасля цырымоніі адкрыцця ў сталіцы Літвы Інфармацыйнага пункта СЕ для беларусаў.

Адзначаецца, што Ціханоўская і Берсе абмеркавалі, у прыватнасці, “як зрабіць так, каб Інфармацыйны пункт быў максімальна карысны для беларусаў і грамадзянскай супольнасці“.

Гаворка ішла пра “магчымасць выкарыстоўваць яго як пляцоўку для мерапрыемстваў, дыпламатычнага і палітычнага адвакатавання, а таксама для пашырэння інфармацыі аб магчымасцях для беларусаў у сферах адукацыі, мабільнасці і супрацоўніцтва з Саветам Еўропы“.

Паводле слоў Ціханоўскай, яна “разумее, наколькі для Савета Еўропы адкрыццё такога пункта з’яўляецца беспрэцэдэнтнай ініцыятывай і праз якія складанасці давялося прайсці, каб гэта стала магчымым“.

Яна падкрэсліла, што інфапункт “мае вялікае сімвалічнае значэнне для беларусаў у выгнанні — як знак таго, што Савет Еўропы гатовы падтрымліваць беларусаў“. Але разам з тым ён “будзе мець і практычнае вымярэнне — дапамагаючы беларусам атрымліваць доступ да ведаў, кантактаў і магчымасцяў, звязаных з еўрапейскімі інстытутамі“.

У цырымоніі адкрыцця згаданага інфапункта 12 траўня ў Літоўскай нацыянальнай бібліятэцы ім. Марцінаса Мажвідаса, акрамя Ціханоўскай і Берсе, прынялі ўдзел спікер Сейма Літвы Юозас Алекас і міністр замежных спраў Кястуціс Будрыс. Інфапункт атрымаў акрэдытацыю МЗС Літвы.

У сваім выступе Берсе, у прыватнасці, заявіў, што інфапункт стане запамогай у працы дэмакратычных сіл і “спросціць абмен думкамі паміж Саветам Еўропы і тымі, хто верыць у дэмакратычную Беларусь”.