У Польшчы за ўдзел у арганізаванай злачыннай групе арыштавана трое беларусаў

21 траўня, Позірк. Аб ліквідацыі Паморскім аддзяленнем Нацыянальнай падатковай адміністрацыі (НПА) і Цэнтральным бюро расследаванняў паліцыі (ЦБРП) Польшчы злачыннай групы, якая займалася кантрабандай цыгарэт, паведамляецца 21 траўня на сайце НПА.

Адзначаецца, што супрацоўнікі ЦБРП, “праводзячы аператыўныя і працэсуальныя мерапрыемствы, высветлілі, што ў порт Гданьска накіроўваецца кантэйнер з Сінгапура, у якім могуць знаходзіцца значныя партыі нелегальных цыгарэт невядомага паходжання“. Пры гэтым з транспартнай дакументацыі вынікала, што груз змяшчае паветраныя фільтры для аўтамабіляў. Падазроны груз “быў узяты пад назіранне службаў”.

“У другой палове лютага 2026 года супрацоўнікі Паморскага мытна-падатковага ўпраўлення ў Гдыні і паліцыі правялі аперацыю, падчас якой было затрымана 5 мужчын ва ўзросце ад 37 да 58 гадоў: 2 грамадзяніны Польшчы і 3 грамадзяніны Беларусі. Затрыманне адбылося ў момант перагрузкі тавару з кантэйнера ў фургон і іншы кантэйнер“, — гаворыцца ў рэлізе.

Паведамляецца аб канфіскацыі больш за 14 млн цыгарэт без польскіх акцызных марак. Кошт перахопленага тавару ацэньваецца больш чым у 14,5 млн злотых (больш за 3,8 млн долараў).

Затрыманым у акруговай пракуратуры Гданьска прад’яўленыя абвінавачванні, якія тычацца, у прыватнасці, удзелу ў арганізаванай злачыннай групе, здзяйснення крымінальна-падатковых злачынстваў, а таксама падрыхтоўкі да выкарыстання падробленых дакументаў.

Паводле інфармацыі НПА, суд першай інстанцыі ўжыў арышт у дачыненні да трох грамадзян Беларусі, тады як у дачыненні да двух грамадзян Польшчы — меры стрымання, не звязаныя з пазбаўленнем волі.

Пракурор абскардзіў гэтае рашэнне, пасля чаго акруговы суд у Гданьску змяніў папярэднюю пастанову, пастанавіўшы арыштаваць і палякаў. Паколькі за гэты час яны паспелі схавацца, пракуратура абвясціла іх у вышук.