У 14 раёнах Гомельскай вобласці пракуратура выявіла праблемы ў арганізацыі даступнага асяроддзя

3 чэрвеня, Позірк. У 14 раёнах Гомельскай вобласці выяўленыя праблемы ў арганізацыі даступнага асяроддзя, паведамляе Генеральная пракуратура са спасылкай на рэгіянальную пракуратуру.

Адзначаецца, што не ў поўнай меры функцыянавала і аўтаматызаваная інфармацыйная сістэма “Даступнае асяроддзе“: звесткі аб аб’ектах сацыяльнай інфраструктуры не былі ўнесеныя альбо не адпавядалі рэчаіснасці.

Для ліквідацыі выяўленых парушэнняў і забеспячэння выканання правоў і законных інтарэсаў сацыяльна ўразлівай катэгорыі грамадзян “прынятыя меры пракурорскага рэагавання“. Для выпраўлення сітуацыі пракуроры вобласці ўнеслі сем прадстаўленняў у раённыя і гарадскія выканкамы, а таксама ў Гомельскі аблвыканкам.

У жылым доме ў Гомелі адноўлены з’езд ля аднаго з пад’ездаў. Для забеспячэння даступнасці стаматалагічнай паліклінікі ў Чачэрску вырашана перавесці яе ў будынак цэнтральнай раённай бальніцы.

Таксама паведамляецца, што пракуратура Светлагорскага раёна выявіла факт неналежнага сацыяльнага абслугоўвання пажылых грамадзян, якія пражываюць у сельскай мясцовасці. 91-гадовая жанчына, якая заключыла дамову з раённым цэнтрам сацыяльнага абслугоўвання насельніцтва (ЦСАН) аб выплатным наданні паслуг, не атрымлівала паслугі ў поўным аб’ёме. Паводле ўмоваў дагавора, з сакавіка 2024 года пенсіянерка мела права на дапамогу сацыяльнага работніка два разы на тыдзень на працягу каля двух гадзін, са жніўня 2025 года — каля гадзіны. У гутарцы з жанчынай высветлілася, што з канца 2025 года сацработнік на сваю ініцыятыву стаў наведваць жанчыну раз на тыдзень. У перыяд яго знаходжання ў адпачынку сацыяльная дапамога не надавалася зусім. Пры гэтым брыгады сацыяльнага абслугоўвання на мабільнай аснове ЦСАН Светлагорскага раёна не задзейнічаў.

На патрабаванне пракуратуры Светлагорскага раёна адказныя службы ўзмацнілі кантроль за наданнем сацыяльных паслуг жанчыне, вінаватыя прыцягнутыя да дысцыплінарнай адказнасці.

У Гомельскай вобласці на ўліку ў тэрытарыяльных цэнтрах знаходзіцца больш за 90 тыс. інвалідаў і 253 тыс. пажылых грамадзян.

Паводле даных Міністэрства працы і сацыяльнай абароны, на пачатак 2026 года доля цалкам даступных сацыяльна значных аб’ектаў у Беларусі складала 23-24%, часткова даступных — каля 70%.

Пад поўнай даступнасцю разумеецца комплекснае ўладкаванне: не толькі вонкавыя пандусы, але і поўная адаптацыя ўнутры — ад пашыраных дзвярных праёмаў і спецыяльных санвузлоў да тактыльнай пліткі, элементаў са шрыфтам Брайля і гукавых маўленчых інфарматараў.

Часткова даступныя аб’екты (з элементамі безбар’ернага асяроддзя) абсталяваныя базавымі элементамі, напрыклад усталяваны толькі пандус на ўваходзе або поручні.

У 2022 годзе цалкам даступнымі для людзей з абмежаванымі магчымасцямі было 18% аб’ектаў.