Прэзідэнт Узбекістана Мірзіёеў наведае Беларусь, анансаваная сустрэча з Лукашэнкам
7 ліпеня, Позірк. Візіт у Беларусь прэзідэнта Узбекістана Шаўката Мірзіёева анансавала 7 ліпеня прэс-служба Аляксандра Лукашэнкі.
Візіт пройдзе 8–9 ліпеня. Адзначаецца, што на сустрэчы Мірзіёева і Лукашэнкі будуць абмяркоўвацца “развіццё вытворчай кааперацыі і рэалізацыя сумесных праектаў”.
Чакаецца, што палітыкі таксама разгледзяць “актуальныя пытанні двухбаковага супрацоўніцтва і перспектывы яго ўмацавання ў розных сферах”.
“Да падпісання па выніках перамоў рыхтуюцца каля двух дзясяткаў дакументаў. Галоўны з іх — дэкларацыя аб устанаўленні стратэгічнага партнёрства паміж Рэспублікай Беларусь і Рэспублікай Узбекістан”, — гаворыцца ў паведамленні.
Мірзіёеў наведваў Мінск 26–27 чэрвеня 2025 года як удзельнік Вышэйшага Еўразійскага эканамічнага савета.
Лукашэнка быў ва Узбекістане ў лютым 2024 года. Па выніках таго візіту яны з Мірзіёевым выступілі з сумеснай заявай, у якой адзначылі, што Мінск і Ташкент “працягнуць прыкладаць намаганні для далейшага развіцця партнёрства”. У заяве таксама гаварылася, што “прыярытэтным кірункам” беларуска-ўзбекскіх стасункаў з’яўляецца “далейшае пашырэнне ўзаемавыгаднага гандлёва-эканамічнага супрацоўніцтва”.
23 чэрвеня паведамлялася, што прэм’ер-міністр Аляксандр Турчын выказаў надзею на павелічэнне беларуска-ўзбекскага тавараабароту па выніках 2026 года да 1 млрд долараў. Ён таксама заявіў пра “амбітную задачу” падвоіць гэты паказчык у 2030 годзе.
Пра тое, што Узбекістан і Беларусь распрацоўваюць праграму па павелічэнні тавараабароту да 2 млрд долараў да 2030 года, у траўні паведамлялі ўзбекскія СМІ.
Паводле іх даных, па выніках 2025 года аб’ём узаемнага гандлю вырас на 25% — да 965 млн долараў (у 2024-м — 774 млн, у 2023-м — 654,7 млн), а за першы квартал 2026 года павялічыўся амаль на 50%, склаўшы 259,7 млн долараў.
Беларускія звесткі трохі больш сціплыя: сёлета ў лютым амбасадар Беларусі ва Узбекістане Аляксандр Агароднікаў заяўляў, што, папярэдне, па выніках 2025 года знешнегандлёвы абарот Беларусі і Узбекістана перавысіў 850 млн долараў.
Паводле яго слоў, Беларусь пастаўляе на ўзбекскі рынак прадукцыю сельскагаспадарчага машынабудавання, дрэваапрацоўкі, прадукты (мяса, малочную прадукцыю, лекі), у зваротным кірунку ідуць “садавіна, вінаград, кавуны, дыні — тое, да чаго ўжо прызвычаіліся беларускія пакупнікі”.
