Кіроўца грузавіка шпіталізаваны пасля ДТЗ у Столінскім раёне

7 ліпеня, Позірк. Пра дарожна-транспартнае здарэнне з удзелам грузавога аўтамабіля ў Столінскім раёне (Брэсцкая вобласць) паведамляе Міністэрства па надзвычайных сітуацыях.

7 ліпеня ў МНС паступіла інфармацыя пра ДТЗ у вёсцы Альманы, адзначае ведамства.

“На адной з вуліц населенага пункта перакуліўся грузавы аўтамабіль. У выніку аварыі кіроўца апынуўся заблакаваным у кабіне транспартнага сродку”, — гаворыцца ў паведамленні.

Работнікі МНС “пры дапамозе гідраўлічнага аварыйна-выратавальнага інструмента дэблакавалі пацярпелага і перадалі медыкам”.

Кіроўца шпіталізаваны.

Колькасць дарожна-транспартных здарэнняў знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам” аналізу даных Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўмаваных — на 8,4% (з 3.804 да 3.483).